करोना; या देशांना चिनी वस्तूंनी दिला धोका

लंडन : विविध युरोपियन राष्ट्रांनी करोनाशी लढा देण्यासाठी आवश्यक असलेल्या चीनच्या वस्तू नाकारल्या आहेत. स्पेन, तुर्की आणि नेदरलँडमधील प्रशासनाच्या मते, चीनच्या हजारो टेस्टिंग किट, वैद्यकीय साहित्य आणि मास्क मानकांना धरुन नाही किंवा सदोष आहे. युरोप करोनाशी सध्या लढा देत आहे. इटलीत १० हजारपेक्षा जास्त जणांचा मृत्यू झाला आहे, तर हजारो जण बाधित आहेत. शनिवारी डचच्या आरोग्य मंत्रालयाने ६ लाख मास्क परत मागवले. हे मास्क चीनमधून २१ मार्च रोजी आणण्यात आले होते. शिवाय विविध आघाडीच्या मेडिकल्समध्ये याचं वितरणही करण्यात आलं होतं. यापैकी एकही मास्क वापरायचं नाही, असा निर्णय डच प्रशासनाने घेतला आहे.

करोना: 'मेड इन चायना' किटने दिला स्पेनला धोका

स्पेनने चीनच्या कंपनीकडून मागवलेल्या टेस्टिंग किटसोबतही हीच समस्या आढळून आली. करोनाशी लढा देण्यासाठी हजारो किट आणण्यात आल्या आहेत. पण यापैकी ६० हजार किट अशा आहेत ज्या रुग्ण करोनाबाधित असल्याचं निदान करू शकत नाहीत, असं स्पेन प्रशासनाने सांगितलं. यावर स्पेनमधील चीन दुतावासाने स्पष्टीकरणही दिलं आहे. स्पेनने ज्या कंपनीकडून किट आणल्या, त्या कंपनीला अधिकृत परवानाच दिलेला नाही, असं स्पष्टीकरण चीन दुतावासाने दिलं.

चीनच्या कंपनीकडून आणलेल्या टेस्टिंग किट अयोग्य असल्याचा आरोप तुर्कीनेही केला आहे. पण ३५ हजार किट योग्य पद्धतीने काम करत असल्याचंही तुर्कीने सांगितलं. आपला प्रभाव वाढवण्यासाठी चीनकडून करोनाचा वापर केला जाऊ शकतो, अशी टीका होत असतानाच उपकरणांमधील दोषही समोर आला आहे.

करोना नियंत्रण: 'इथे' चुकले पाश्चिमात्य देश?

स्पेनमध्ये करोनाने हाहाकार माजला आहे. करोनाचे थैमान थांबण्यास कोणतीही चिन्ह नसल्याचे चित्र आहे. सोमवारी, स्पेनमध्ये ९१३ जणांचे मृत्यू झाले आहेत. यामुळे करोनाने मृत्युमुखी पडणाऱ्यांची संख्या ७ हजार ७१६ वर पोचली आहे. दरम्यान, करोना विषाणूच्या संसर्गामुळे युरोपामध्ये २५ हजारपेक्षा अधिक जणांचा मृत्यू झाल्याचे 'एएफपी'ने संकलित केलेल्या माहितीवरून स्पष्ट झाले आहे.

स्पेनमध्ये रविवारी ८३८ जणांचे बळी गेले होते. मात्र गेल्या २४ तासांत बळींची आणि रुग्णांची संख्या घटल्याचा दावा प्रशासन करत असतानाच सोमवारी मृतांची संख्या वाढली. सोमवारी, ७८४६ जणांना करोनाची बाधा असल्याचे आढळून आले. त्यामुळे स्पेनमध्ये रुग्णांची संख्या सुमारे ८८ हजार झाली आहे. युरोपमध्ये तीन लाख ९९ हजारहून अधिकजणांना करोनाची बाधा झाली आहे. युरोपियन खंडामध्ये करोनामुळे सर्वाधिक मृत्यू झाले आहेत. इटलीमध्ये ११ हजार ५९१ जणांचे मृत्यू झाले आहेत. तर, स्पेनमधील मृतांची संख्या ७७१६ वर पोहचली आहे.