लंडन स्फोट; प्रत्यक्षदर्शीने सांगितला थरार

मटा ऑनलाइन वृत्त । लंडन

लंडनमध्ये मेट्रो रेल्वेत स्फोट घडवून दहशतवादी हल्ला करण्यात आला. लंडनच्या पार्सन्स ग्रीन स्टेशन्सवरील या दहशतवादी हल्ल्याचा थरार सॉफ्टवेअर डेव्हलपर सिल्वेन पेनेक यांनी प्रत्यक्ष बघितला. ते स्फोटाच्या ठिकाणापासून १० मीटर अंतरावर उभे होते. यावेळी अचानक स्फोट झाला आणि संपूर्ण गाडीत सर्वत्र धूर पसरला.

अचानक मोठा आवाज झाला. मी तिकडे बघितलं तर सर्वत्र धूर पसरला होता आणि मेट्रोतल्या प्रवाशांची धावपळ सुरू झाली. प्रत्येकजण बाहेर पडण्यासाठी धडपडत होता. चेंगराचेंगरीची परिस्थिती होती. तर काही धक्काबुक्की करत बाहेर पडण्याचा प्रयत्न करत होते. आम्ही भाग्यवान ठरलो कारण गाडी पार्सन्स ग्रीन स्थानकात होती आणि गाडीचे दरवाजे उघडले गेले होते, असं सिल्वेन यांनी सांगितलं. ज्या बादलीत स्फोट झाला ती मेयोनीजने भरलेली वाटत होती. हे मेयोनीज घरी बनवल्यासारखे दिसत होते, असं सिल्वेन म्हणाले.