Coronavirus vaccine करोना: रशियात पुढील आठवड्यात लसची नोंदणी होणार

मॉस्को: करोनाला अटकाव करणाऱ्या लशींची अंतिम टप्प्यातील चाचणी सुरू असताना रशियाने मोठी घोषणा केली आहे. रशियन संशोधकांनी विकसित केलेली लस १० ते १२ ऑगस्ट रोजी लस लाँच करण्यात येणार आहे. जगभरात करोनावरील ही पहिली लस आहे. या लशीबाबतची सर्व तयारी पूर्ण करण्यात आल्याची माहिती सूत्रांनी दिली आहे.

वृत्तसंस्था ब्लूमबर्गने दिलेल्या माहितीनुसार, या लशीची पहिल्यांदा नोंदणी करण्यात येणार आहे. त्यानंतर तीन ते सात दिवसांमध्ये ही लस सामान्य नागरिकांना उपलब्ध करून देण्यात येणार आहे. करोनाला अटकाव करणारी ही लस गामालेया नॅशनल रिसर्च सेंटर ऑफ एपिडेमीलॉजी अॅण्ड मायक्रोबायोलॉजीने तयार केली आहे.

उफा शहरातील एका कर्करोग उपचार केंद्राचे उद्धाटन करण्यासाठी आलेल्या रशियाचे आरोग्य उपमंत्री ओलेग ग्रिडनेव यांनी सांगितले की, करोना लशीची तिसरी व अंतिम टप्प्यातील चाचणी सुरू आहे. ही चाचणी अतिशय महत्त्वपूर्ण आहे. ही लस अधिक सुरक्षित करण्यावर आम्ही भर दिला असून सुरुवातीच्या टप्प्यात आरोग्य कर्मचारी आणि वरिष्ठ नागरिकांना ही लस देण्यात येणार असल्याचे त्यांनी सांगितले.

वाचा: चीन: करोनामुक्त झालेल्या ९० टक्के बाधितांच्या फुफ्फुसावर परिणाम

'स्पुटनिक न्यूज'ने संरक्षण मंत्रालयाच्या हवाल्याने दिलेल्या वृत्तानुसार, या लस चाचणीचे सकारात्मक परिणाम समोर आले आहेत. लस देण्यात आलेल्या व्यक्तींमधील रोगप्रतिकारक शक्ती चांगली विकसित झाली आहे. त्याशिवाय कोणतेही साइड इफेक्टस जाणवत नसल्याचाही दावा करण्यात आला आहे. गामालोया इन्सिट्यूटच्या वैज्ञानिकांनी सांगितले की, लस सामान्य जनतेसाठी उपलब्ध करून देण्यासाठी १० ऑगस्टपर्यंत मंजुरी मिळवण्याचा प्रयत्न सुरू आहे. सर्वात आधी ही लस आरोग्य कर्मचाऱ्यांना देण्यात येणार आहे.

वाचा: करोनावर 'जादूई' लस विकसित केल्याचा इस्रायलचा दावा


वाचा: करोना लस: ब्रिटनसोबत आणखी एका भारतीय कंपनीचा करार

रशियाकडून एका बाजूला लस बाजारात आणण्याची तयारी सुरू असताना जागतिक आरोग्य संघटनेने चिंता व्यक्त केली आहे. रशियाने लस विकसित करताना, चाचणी करताना जागतिक आरोग्य संघटनेने आखून दिलेल्या निर्देशांचे, सूचनांचे पालन केले नाही. कोणतीही लस तिसऱ्या टप्प्यातील चाचणीशिवाय सर्वांना उपलब्ध करून देण्यात येत असेल हे धोकादायक असल्याचेही जागतिक आरोग्य संघटनेच्या प्रवक्त्यांनी सांगितले. जागतिक आरोग्य संघटनेचे प्रवक्ते क्रिस्टीयन लिंडमियर यांनी सांगितले की, अनेकदा संशोधकांकडून लस विकसित झाल्याचा दावा करण्यात येतो. ही खरंतर आनंदाची बातमी असते. मात्र, लस प्रभावी असल्याचे संकेत मिळणे आणि क्लिनिकल चाचणीच्या सर्व टप्प्यांमधून लशीची चाचणी करणे यामध्ये फरक असल्याचे त्यांनी सांगितले.