हिलरी-ट्रम्प यांच्यात आरोप-प्रत्यारोपांच्या फैरी

मटा ऑनलाइन वृत्त । न्यूयॉर्क

अमेरिकेच्या अध्यक्षपदाच्या निवडणुकीसाठी पहिली अध्यक्षीय चर्चा आज भारतीय वेळेनुसार पहाटे झाली. अध्यक्षपदाचे उमेदवार डेमोक्रेटिक पक्षाच्या हिलरी क्लिंटन आणि रिपब्लिकन पक्षाचे डोनाल्ड ट्रम्प यांच्यात आरोप-प्रत्यारोपांच्या फैरी झडल्या. हिलरी यांच्या ई-मेल प्रकरणावर ट्रम्प यांनी हल्ला केला तर ट्रम्प यांच्या अर्थनितीवर हिलरी यांनी टिकेची झोड उठवली. ट्रम्प यांच्या करबुडवेगिरीचा मुद्दाही हिलरी यांनी उचलला.

अमेरिकेवर बाहेरच्या देशांतून होणारे सायबर हल्ले, आयसिसचा दहशतवाद, वर्णद्वेष, मध्य पूर्वेच्या देशांशी संबंध, इराक युद्धावरचं मत अशा अनेक मुद्द्यांवर दोघांनीही आपली मते मांडली. दीड तास कालावधीच्या या चर्चेची सुरूवात हिलरी यांना नियंत्रकांनी प्रश्न विचारून केली. पहिलाच प्रश्न अमेरिकन कर्मचाऱ्यांच्या रोजगारासाठी नव्या संधी निर्माण करण्याबाबतचा होता. हिलरी महिला रोजगारावर बोलल्या तर ट्रम्प यांनी मेक्सिको आणि अन्य देश अमेरिकेच्या नोकऱ्या चोरत असल्याचा आरोप केला.

८ नोव्हेंबरला हि निवडणूक होणार आहे. ही जाहीर चर्चा न्यूयॉर्कच्या हॉफ्स्ट्रा विद्यापीठात झाली. सुमारे १० कोटी अमेरिकन नागरिकांनी ही चर्चा एेकल्याचे सांगितले जात आहे.

चर्चेतले महत्त्वाचे मुद्दे -

कर-परतावे - वैयक्तिक सर्व्हर कामकाजासाठी वापरल्याची जबाबदारी हिलरी यांनी स्वीकारली. हिलरी त्यांचे 'ते ३३,०००' इमेल्स उघड करतील, तर मीही माझे कर-परतावे जाहिर करीन, असे आव्हान ट्रम्प यांनी दिले.

वर्णद्वेष- वर्णद्वेषाचा विखार ट्रम्प सातत्याने पसरवत असल्याचा आरोप हिलरी यांनी केला. बराक अोबामा अमेरिकेचे नागरिक नसल्याचा खोटा प्रचार ट्रम्प करत होते. ट्रम्प यांच्यावर वर्णद्वेष केल्याची केस १९७३ मध्ये नोंदली गेली आहे. त्यांच्या करिअरची सुरुवातच तिथून झाल्याची टिका हिलरी यांनी केली.

सायबर हल्ले- अमेरिकेवर विशेषतः रशियाकडून होणाऱ्या सायबर हल्ल्यांबाबत हिलरी यांनी चिंता व्यक्त केली आणि त्याचवेळी रशियाचे अध्यक्ष व्लादिमिर पुतीन यांचे ट्रम्पकडून वारंवार कौतुक होत असल्याचा आरोप केला, ट्रम्प यांनी 'राँग' म्हणत हा आरोप फेटाळला.

मध्यपूर्व देश आणि मुस्लीमांशी संबंध- अमेरिकेतल्या मुस्लीमांना विश्वासात घेणं ही दहशतवादाशी लढण्यातली एक प्रमुश पायरी आहे, असं सांगत ट्रम्प सातत्याने अमेरिका आणि परदेशी मुस्लीमांचा अपमान करतात, असं त्या म्हणाल्या. इराक युद्धाला माझा विरोध होता. मी कधीही या युद्धाला पाठिंबा दिला नव्हता, असं ट्रम्प म्हणाले. नाटोनं मध्य पूर्वेला अमेरिकेसोबत जाउन इस्लामिक स्टेट गटांचा प्रतिकार करण्याची गरज असल्याचंही ते म्हणाले.