दुर्रानी यांच्यावर बंदी

इस्लामाबाद : पाकिस्तानी गुप्तहेर संस्था आयएसआयचे माजी प्रमुख लेफ्टनंट जनरल आसद दुर्रानी यांना पाकिस्तानी लष्कराने सोमवारी देश सोडण्यावर बंदी घातली. तसेच त्यांच्या पुस्तकाबद्दल 'कोर्ट ऑफ इन्क्वायरी'चे आदेशही दिले आहेत.

दुर्रानी यांनी भारताच्या 'रॉ'चे माजी प्रमुख ए.एस. दुलत यांच्याबरोबर पुस्तक लिहिले आहे. त्यावरून पाकिस्तानी लष्कराने दुर्रानी यांना देश सोडण्यास बंदी घातली आहे. आयएआयचे प्रसिद्धीप्रमुख मेजर जनरल असिफ गफूर यांनी सोमवारी ट्विट करून ही माहिती दिली. दुर्रानी देश सोडून जाऊ नयेत यासाठी त्यांचे नाव बंदी घातलेल्या प्रवाशांमध्ये समाविष्ट करण्याचे आदेश लष्कराने गृहमंत्रालयाला दिले आहे, असे त्यांनी सांगितले. दुर्रानी यांना आज रावळपिंडीत लष्करी मुख्यालयात बोलावून त्यांच्याकडे पुस्तकाबद्दल खुलासा मागण्यात आला, असेही गफूर यांनी ट्विट केले आहे. दुर्रानी यांनी पुस्तक लिहून नियमभंग केल्याचा लष्कराचा आरोप आहे.