कुत्रा चावल्यामुळं राष्ट्रपतींच्या मुलाचा मृत्यू

मटा ऑनलाइन वृत्त । बांजूल

पश्चिमी अफ्रिकेतील गांबिया या देशाचे नवनिर्वाचित राष्ट्रपती आडमा बैरो यांच्या आठ वर्षांच्या मुलाचा कुत्रा चावल्यामुळं मृत्यू झाला आहे. कुत्रा चावल्यानंतर मुलाला तात्काळ रुग्णालयात नेण्यात आलं. मात्र, तिथं पोहोचण्याआधीच त्याचा मृत्यू झाला.

आडमा बैरो यांचं कुटुंब गांबियाची राजधानी बांजूल इथं वास्तव्यास आहे. तिथंच त्यांच्या मुलावर अंत्यसंस्कार करण्यात आले. मात्र, राष्ट्रपती स्वत:च्या मुलाच्या अंत्यसंस्काराला उपस्थित राहू शकले नाहीत. सुरक्षेच्या कारणास्तव बैरो सध्या सेनेगलमध्ये असून गुरुवारी ते राष्ट्रपतीपदाची शपथ घेणार आहेत.

आडमा बैरो यांनी मागील वर्षी राष्ट्रपतीपदाची निवडणूक जिंकली होती. मात्र, १९९४पासून या पदावर असलेल्या याहया जामेह यांनी पराभवानंतरही पद सोडल्यास नकार दिल्यानं बैरो यांचा शपथविधी लांबला होता. सर्वोच्च न्यायालयाच्या आदेशामुळं त्यांचा राष्ट्रपतीपदाचा मार्ग मोकळा झाला आहे.