बाप रे बाप! पाकिस्तानात एकाला ३८ मुले

मटा ऑनलाइन वृत्त । बन्नू

एकाद्या व्यक्तीला साधारण किती मुले असू शकतात...दोन...चार...पाच...दहा...बारा...नाही सांगता येत ना? वाचून तुम्हाला कदाचित धक्का बसेल. पण खरं आहे. पाकिस्तानमध्ये एका व्यक्तीला तब्बल ३८ मुले आहेत. तर आणखी दोन जणांना प्रत्येकी ३६ मुले असल्याचं पाकिस्तानच्या जनगणनेतून आढळून आलं आहे. आश्चर्य म्हणजे एवढी मुलं असल्याचं त्यांना काहीच वाटत नाही. मुलंही अल्लाहची देण असल्याचं त्यांचं म्हणंण आहे.

पाकिस्तानात १९ वर्षानंतर जनगणना करण्यात आली. त्याचा अहवाल जुलैमध्ये येण्याची शक्यता आहे. पण या जनगणनेतून अनेक आश्चर्यकारक माहिती पुढे आली आहे. १९९८ मध्ये पाकिस्तानची लोकसंख्या १३.५ कोटी होती. आता ही लोकसंख्या २० कोटीवर पोहचलीय. जागतिक बँक आणि सरकारी आकडेवारीनुसार पाकिस्तान दक्षिण आशियातील सर्वाधिक जन्मदर असणारा देश आहे. पाकिस्तानात सरासरीनुसार प्रत्येक महिलेला तीन मुलं आहेत. वाढत्या लोकसंख्येमुळे पाकिस्तानच्या अर्थकारण आणि सामाजकारणावर परिणाम होत असून त्यामुळे वेळीच सावध राहण्याचा इशारा तज्ज्ञांनी दिला आहे.

बलूचिस्तानच्या क्वेटामध्ये राहणाऱ्या जान मोहम्मद यांना ३८ मुले आहेत. २०१६ मध्येच त्यांनी चौथे लग्न करण्याचा इरादा बोलून दाखवला होता. कारण त्यांना १०० मुलांना जन्म द्यायचा होता. पण कोणतीच महिला त्यांच्याशी लग्न करायला तयार नाही. पण तरीही त्यांनी चौथ्या लग्नासाठी गुडघ्याला बाशिंग बांधले आहे. मुस्लिमांची जेवढी जास्त लोकसंख्या असेल तेवढे चांगले. त्यामुळे पाकिस्तानला शत्रू घाबरतील. मुसलमानांनी जास्तीत जास्त मुलांना जन्म दिला पाहिजे, असं त्यांनी सांगितलं.

क्रिकेट खेळण्यासाठी मित्रांची गरज नाही

३६ मुलांचा बाप असलेल्या गुलजार खान यांच्या म्हणण्यानुसार अल्लाहने संपूर्ण जगात मानवाची निर्मिती केली आहे. त्यामुळे मुलं जन्माला घालणारी नैसर्गिक प्रक्रिया का थांबवू? इस्लाम कुटुंब नियोजनाच्या विरोधात आहे. कबाली परिसरातील बन्नू येथे राहणारे गुलजार (५७) यांची तिसरी बायको गर्भवती आहे. आम्हाला सक्षम व्हायचे आहे. क्रिकेट खेळताना माझ्या मुलांना आता मित्रांची गरज नाही, असं गुलजार यांनी सांगितलं.

गुलजारचा भाऊ मस्तान खान वजीर यांनाही तीन पत्नी आहेत. वजीर यांना २२ मुले आहेत. त्यांच्या नातवंडांची संख्या एवढी आहे की त्यांना मोजताही येत नाही, असं मस्तान खान यांचं म्हणणं आहे. अन्न आणि वस्त्र देण्याचं अल्लाने वचन दिलं आहे. पण लोकांचा विश्वास कमी आहे, असं त्यांचं म्हणणं आहे.