अमेरिकेत रिपब्लिकन खासदारावर गोळीबार

मटा ऑनलाइन वृत्त । वॉशिंग्टन

अमेरिकेतील रिपब्लिकन पक्षाचे नेते, खासदार स्टिव्ह स्कॅलीस यांच्यावर गोळी झाडण्यात आली आहे. या हल्ल्यामुळे गंभीर जखमी झालेल्या स्कॅलीस यांना तात्काळ रूगणालयात दाखल करण्यात आले असून त्यांची प्रकृती स्थिर असल्याचं सांगण्यात आलं. या घटनेमुळे अमेरिकेत एकच खळबळ उडाली असून याप्रकरणी एका संशयिताला अटक करण्यात आली आहे.

स्कॅसी हे व्हर्जनियाच्या अलेक्झान्ड्रा येथे काँग्रेस खासदारांच्या बेसबॉल प्रॅक्टिसमध्ये सहभागी झाले होते. ५१ वर्षीय स्कॅसी यांच्या पाठीमागून अज्ञात इसमाने गोळी झाडली. त्यामुळे ते तात्काळ जागेवर कोसळले. गोळीचा आवाज ऐकताच इतर खासदारांना स्कॅसी यांच्या दिशेने धाव घेऊन त्यांना तात्काळ जॉर्ज वॉशिंग्टन रूग्णालयात दाखल करण्यात आले. अज्ञात व्यक्तिने केलेल्या या हल्ल्यात आणखी काही लोक जखमी झाल्याचे अमेरिकन काँग्रेसच्या एका सदस्याने सांगितले. स्कॅसी यांच्यावर झालेल्या या भ्याड हल्ल्याचा अमेरिकेचे राष्ट्रपती डोनाल्ड ट्रम्प यांनी निषेध नोंदविला आहे. या घटनमुळे मला वेदना झाल्या असून या घटनेवर आपण लक्ष ठेऊन असल्याचं ट्रम्प यांनी सांगितलं. स्कॅसी हे लुईजियानाचे रहिवाशी असून २००८ मध्ये ते पहिल्यांदा काँग्रेससाठी निवडून आले होते. ते रिपब्लिकन पक्षातील तिसऱ्या क्रमांकाचे बडे नेते मानले जातात.