‘एच-१बी’चे शुल्क आणखी वाढणार

वृत्तसंस्था, वॉशिंग्टन

अमेरिकेतील 'शिकाऊ उमेदवार' कार्यक्रमाची व्याप्ती वाढविण्यासाठी निधी उपलब्ध व्हावा, यासाठी अमेरिकेने एच-१बी व्हिसाचे शुल्क वाढविण्याचा निर्णय घेतला आहे. अमेरिकेचे कामगार मंत्री अलेक्झांडर अॅकोस्टा यांनी या संदर्भातील माहिती दिली. यामुळे भारतातील आयटी कंपन्यांवरील बोजा वाढणार आहे. कामगार मंत्रलयाचा वार्षिक अर्थसंकल्प सादर करण्याची तयारी सध्या सुरू आहे. या अनुषंगाने अमेरिकी काँग्रेसच्या सदस्यांसमोर अॅकोस्टा यांनी ही माहिती दिली. एक ऑक्टोबरपासून अमेरिकेच्या नव्या आर्थिक वर्षाची सुरुवात होणार आहे. अर्थात, व्हिसाच्या शुल्कामध्ये किती वाढ करण्यात येईल, याबद्दल अॅकोस्टा यांनी कोणतीही माहिती दिलेली नाही. एच-१बी व्हिसाच्या अर्जामध्येही अनेक बदल करण्याचे सूतोवाच अॅकोस्टा यांनी केले.