हाफीज सईदची तुरुंगातून मध्यस्थी

वृत्तसंस्था, लाहोर मुंबई हल्ल्याचा सूत्रधार कुख्यात दहशतवादी हाफिज सईद कारागृहातून पोलिस प्रकरणांत मध्यस्थी करीत असल्याचे उघड झाले आहे. सईद हा बंदी घातलेल्या 'जमात-उद-दवा'चा म्होरक्या असून, संयुक्त राष्ट्रसंघाच्या दहशतवाद्यांच्या सूचीतही त्याचे नाव आहे. कारागृहातूनही तो कारवाया करीत असल्याचे सूत्रांनी म्हटले आहे. 'एटीएम'मधून पैसे चोरणाऱ्याचा पोलिस कोठडीत मृत्यू झाल्याच्या प्रकरणात त्याने पोलिसांच्या बाजूने मध्यस्थी

केली होती. सलाउद्दीन अयुबी या मानसिक आजार असलेल्या चोरट्याचा कोठडीत मृत्यू झाल्याने पोलिसांविरोधात देशभर निदर्शने करण्यात आली होती. या प्रकरणात सईदने अयुबीच्या कुटुंबीयांशी तडजोड केली. शिवाय, अयुबीच्या गावातील रस्ता आणि अन्य मुलभूत सुविधा पुरविण्याची सूचना प्रशासनाला केली. पोलिसांनीही सईद आणि अयुबीच्या कुटुंबीयांची कारागृहात भेट घडवून ही तडजोड केल्याचेही सूत्रांनी म्हटले आहे. दरम्यान, सध्या दहशतवादी गटांना अर्थसाह्य केल्याच्या आरोपाखाली सईद कारागृहात असला, तरी २०१६मध्ये पंजाब प्रांतात समांतर न्यायव्यवस्था चालवित असल्याचा आरोप त्याच्यावर ठेवण्यात आला होता.