बांगलादेशात आणखी एका हिंदूची हत्या

मटा ऑनलाइन वृत्त । ढाका

हिंदू पुजाऱ्याच्या हत्येला तीन दिवस उलटत नाहीत तोच बांगलादेशात आज आणखी एका हिंदूची निर्घृण हत्या करण्यात आली. नित्यरंजन पांडे असं या ६० वर्षीय व्यक्तीचं नाव असून तो बांगलादेशातील एका आश्रमातील कर्मचारी होता. लागोपाठच्या या घटनांमुळं बांगलादेशातील हिंदू नागरिकांमध्ये दहशतीचं वातावरण आहे.

नित्यरंजन पांडे हे बांगलादेशातील पाबनातील हिमायतपूर येथील ठाकूर अनुकुल चंद्र सत्संग परमतीर्थ हिमायतपूरधाम आश्रमाचे कर्मचारी होते. गेल्या ४० वर्षांपासून ते आश्रमात स्वयंसेवक म्हणून काम करत होते. आज सकाळी मॉर्निंग वॉकसाठी बाहेर पडले असता काही अज्ञात इसमांनी त्यांना गाठले आणि त्यांच्या मानेवर धारदार शस्त्रांचे वार केले. त्यात पांडे यांचा जागीच मृत्यू झाला, अशी माहिती स्थानिक पोलिसांनी दिली.

इस्लामी राष्ट्र असलेल्या बांगलादेशात गेल्या काही दिवसांपासून अल्पसंख्याक, धर्मनिरपेक्षतावादी व बुद्धिवाद्यांवर हल्ले होत आहेत. आयसिसच्या प्रभावाखाली असलेल्या दहशतवादी संघटनांकडून हे हत्यासत्र सुरू असल्याचा संशय आहे.