मोदीच्या अटकेबाबत हाँगकाँगच निर्णय घेईल: चीन

बीजिंग: पीएनबी घोटाळ्याप्रकरणी हिरे व्यापारी नीरव मोदीला अटक करण्यासाठी भारतानं विनंती केली आहे. मात्र मोदीच्या अटकेबाबत हाँगकाँगच निर्णय घेईल, असं आज चीननं स्पष्ट केलं आहे.

नीरव मोदीला अटक करण्यासाठी चीनच्या हाँगकाँग प्रशासनाला विनंती करण्यात आल्याचं परराष्ट्र राज्यमंत्री व्ही.के. सिंग यांनी गेल्याच आठवड्यात संसदेत स्पष्ट केलं होतं. त्यावर बोलताना चीनच्या परराष्ट्र मंत्रालयाचे प्रवक्ते गेंग शुआंग यांनी ही माहिती दिली. 'चीनमध्ये दोन यंत्रणा कार्यरत आहेत. त्यातील मुलभूत कायदे हे हाँगकाँग विशेष प्रशासनिक क्षेत्राच्या अंतर्गत येतात आणि हाँगकाँग विशेष प्रशासनिक क्षेत्राकडेच इतर देशाशी न्यायिक आणि परस्पर सहकार्याची जबाबदारी सोपविण्यात आली आहे,' असं सांगतानाच स्थानिक कायद्यानुसारच मोदीच्या अटकेची कार्यवाही केली जाणार असल्याचंही गेंग शुआंग यांनी स्पष्ट केलं.