काय सांगता...अमेरिकी नागरिकांना हवंय कॅनडाचे नागरिकत्व!

वॉशिंग्टन: जगातील बहुतांशी विकसनशील देशातील नागरिकांची अमेरिकेत स्थायिक होण्याची इच्छा असते. त्यातही भारतीयांना अमेरिकेचे आकर्षण अधिक असते. मात्र, अमेरिकेतील नागरिकांना आता देश सोडून कॅनडात स्थायिक व्हायचे आहे आणि त्याला कारणीभूत ठरलंय ते अमेरिकन राष्ट्राध्यक्षपदासाठीची प्रेसिडेन्शियल डिबेट.

अमेरिकेत नोव्हेंबर महिन्यात होणाऱ्या राष्ट्राध्यक्षपदाच्या निवडणुकीचा प्रचार सुरू झाला आहे. या निवडणुकीच्या अनुषंगाने प्रेसिडेन्शियल डिबेटची पहिली फेरी नुकतीच पार पडली. या अध्यक्षीय वादविवादात विद्यमान राष्ट्राध्यक्ष डोनाल्ड ट्रम्प आणि डेमोक्रेटिक पक्षाचे उमेदवार जो बायडन यांच्यात प्रचंड वादावादी झाली. इतकेच नव्हे तर या दोघांनी एकमेकांना उद्देशून शट अप, मुर्ख अशा शब्दांचाही उल्लेख केला. अमेरिकन प्रेसिंडेन्शियल डिबेटमधील झालेली चर्चा आणि खालावलेला स्तर यामुळे अनेकजणांनी चिंता व्यक्त केली होती. ही चर्चा आतापर्यंतची सर्वात वाईट चर्चा असल्याचे मत अनेकांनी मांडले आहे. त्यातच या डिबेटनंतर अनेकांनी कॅनडाच्या नागरिकत्वाबाबत माहिती घेणे सुरू केले. अमेरिकेच्या राष्ट्राध्यक्षपदाच्या मतदानासाठी जवळपास एक महिन्याचा कालावधी उरला आहे. त्यामुळे आरोप प्रत्यारोपाच्या फैऱ्याही झडत आहेत. निवडणुकीत पराभूत झाल्यास सत्ता हस्तांतरण करण्यास ट्रम्प यांनी नकार दिला आहे. अमेरिकेतील राजकारणाचा स्तर खालावला असल्यामुळे अनेकांनी चिंता व्यक्त केली आहे.

अध्यक्षीय वादविवाद संपल्यानंतर अमेरिकन नागरिकांनी मोठ्या संख्येने कॅनडाचे नागरिकत्व कसे मिळेल, याची माहिती गुगलच्या माध्यमातून शोधण्याचा प्रयत्न केला असल्याचे वृत्त 'द गार्डियन'ने दिले आहे. अमेरिकेतील मॅसेच्युसेट्समध्ये अधिकजणांनी याची माहिती घेतली. त्यानंतर वॉशिंग्टन, मिशिगन या राज्यातील नागरिकांनीही कॅनडा स्थायिक होण्याबाबतची माहिती शोधली असल्याचे समोर आले.

प्रत्येक निवडणुकीत अथवा निवडणुकीनंतर अशाप्रकारची माहिती अनेकजण घेतात. त्यातील काहीजण स्थायिकही होत असतील असेही मत जाणकरांनी व्यक्त केले आहे. जॉर्ज बुश हे निवडणुकीसाठी उभे असताना २००४ मध्ये कॅनडाला स्थायिक होऊयात, अशा प्रकारची चर्चा सुरू झाली होती. मात्र, २०१६ च्या निवडणुकीनंतर यावेळेस सर्वाधिक वेळा कॅनडाला स्थायिक होण्याबाबतची माहिती शोधण्याचा प्रयत्न झाला आहे.