वृत्तसंस्था, वॉशिंग्टन
अमेरिकेचे अध्यक्ष डोनाल्ड ट्रम्प यांच्या विरोधातील महाभियोगाची सुनावणी गुरुवारपासून सुरू झाली. अधिकारांचा गैरवापर आणि संसदेच्या कामत अडथळे हे आरोप ट्रम्प यांच्यावर करण्यात आले असून त्या आधारे त्यांना अध्यक्षपदावरून पदच्युत करण्याची मागणी करण्यात आली आहे.
ही सुनावणी सुरू होण्यापूर्वी सिनेटच्या सदस्यांनी या प्रकरणी नि:पक्ष निर्णय घेण्याची शपथ घेतली. मुख्य न्यायाधीश जॉन रॉबर्ट यांनी सिनेटच्या सदस्यांना ही शपथ दिली. यावेळी ९९ सदस्य उपस्थित होते. तर, एक सदस्य अनुपस्थित होता. शपथ घेतल्यानंतर सिनेट मंगळवारपर्यंत स्थगित करण्यात आली. अमेरिकेच्या इतिहासामधील महाभियोगाची ही चौथी सुनावणी असून या कार्यवाहीचा तपशील टीव्हीवर दाखवण्यात येत आहे.
दरम्यान, ट्रम्प यांनी या कार्यवाहीची खिल्ली उडवत असून ही संपूर्ण प्रक्रियाच 'बनावट' असल्याचे म्हटले आहे. ही प्रक्रिया लवकरच संपेल, अशी आशा त्यांनी पत्रकारांशी चर्चा करताना व्यक्त केली. 'मला विश्वास आहे की, हे सगळे लवकरच संपेल. ही संपूर्ण प्रक्रिया पूर्वग्रहदूषित आहे. परंतु मला या प्रक्रियेतून जावे लागेल,' असे त्यांनी सांगितले.
डेमोक्रेटिक पक्षाचे बहुमत असलेल्या सभागृहामध्ये ट्रम्प यांच्याविरोधात १८ डिसेंबरला महाभियोगाची कारवाई करण्यात आली आहे. मात्र, सिनेटमध्ये ते निर्दोष सिद्ध होण्याची अधिक शक्यता आहे, कारण तिथे रिपब्लिकनच्या सदस्यांची संख्या अधिक आहे. ट्रम्प यांना दोषी ठरविण्यासाठी आणि राष्ट्रपतिपदावरून हटविण्यासाठी दोन तृतीयांश मतांची गरज आहे.