लंडन : भारतीय वंशाच्या तरुणाचा वंशद्वेषी टिप्पणीद्वारे अपमान करण्याची घटना केंब्रिजमध्ये घडली. रिकेश अडवाणी (वय २८) असे या तरुणाचे नाव असून त्याने या प्रकरणी पोलिसांत तक्रार दाखल केली आहे. पोलिसांनी अद्याप संबंधित आरोपीला अटक केलेली नाही. संबंधित आरोपीने बुरखा घातलेल्या महिलेबाबत अश्लाघ्य उद्गार काढल्याने रिकेशने त्या तरुणाला हटकले होते.
रिकेश केंब्रिज विद्यापीठात राज्यशास्त्राचा विद्यार्थी आहे. केंब्रिज हॉस्पिटलमध्ये बुरखा परिधान केलेल्या एका रुग्ण महिलेबाबत एका गोऱ्या माणसाने अश्लाघ्य टिप्पणी केल्यानंतर रिकेशने त्याला हटकले. त्यावर त्याने त्या महिलेस 'मी तुम्हाला उद्देशून काही बोललो नाही,' असे म्हणून, रिकेशकडे मोर्चा वळवला. रिकेशचा वंशद्वेषी टिप्पणीद्वारे अपमान केला आणि 'ब्रेक्झिट, गो बॅक होम' असे म्हटले.
रिकेशने तेथे उपस्थित असलेल्या लोकांना पोलिसांना बोलावण्यास सांगितले. मात्र, मदतीसाठी कुणीही पुढे आले नाही आण या घटनेचे आपल्याला आश्चर्य वाटते व दु:खही वाटते, असे रिकेशने नंतर सांगितले. रिकेश एके काळी निराधार होता. मात्र, त्याने कष्टाने शिक्षण पूर्ण केले आणि आता तो केंब्रिजमध्ये शिकत आहे. निराधार मुलांसाठी तो काम करतो. या घटनेनंतर त्याने उद्वेग व्यक्त करून पोलिसांकडे धाव घेतली. पोलिसांनी अद्याप संबंधित गोऱ्या माणसाला अटक केलेली नाही.
मात्र, केंब्रिज हॉस्पिटलने घडल्या प्रकाराबाबत रिकेशकडे दिलगिरी व्यक्त केली आहे.
---