कुलभूषण यांचं काय होणार?; निर्णय राखून ठेवला

मटा ऑनलाइन वृत्त । हेग

भारतीय नागरिक कुलभूषण जाधव यांना पाकिस्तानने सुनानवेल्या फाशीविरोधात आंतरराष्ट्रीय कोर्टात (आयसीजे) सुरू असलेली सुनावणी पूर्ण करण्यात आली. भारत आणि पाकिस्तान दोन्ही देशांचा आज युक्तिवाद पूर्ण झाला. दोन्ही देशांनी आपली बाजू मांडल्यानंतर आयसीजे निकाल राखून ठेवला. दोन्ही पक्षांची चर्चा करून आसीजे निकालाची तारिख निश्चित करणार आहे. त्यामुळे आयसीजेकडे दोन्ही देशांचे लक्ष लागले आहे.

भारताचे वकिल हरिश साळवे यांनी आंतरराष्ट्रीय कोर्टात पाकिस्तानच्या दाव्याची चिरफाड केली. पाकिस्तानने कुलभूषण जाधव यांना सुनावलेली फाशीची शिक्षा व्हिएन्ना कराराचा भंग असल्याचे हरिश साळवे यांनी नमूद केले. पाकिस्तानने मानवाधिकार आणि आंतरराष्ट्रीय कायद्यांची पायमल्ली करत असून आंतरराष्ट्रीय कोर्टाने हस्तक्षेप करण्याची मागणी केली. सध्याची परिस्थिती चिंताजनक असून पाकिस्तान कुलभूषण जाधव यांना फाशी देऊ शकते याकडेही न्यायालयाचे लक्ष वेधले.

पाकिस्तानने भारताचे आरोप फेटाळून लावत भारतविरोधी कांगावा केला. कुलभूषण जाधव यांच्या जबाबाचा व्हि़डिओ पाकिस्तानने सादर करण्याचा प्रयत्न केला. मात्र, आयसीजेने त्याला सादर करण्याची परवानगी नाकारत पाकला दणका दिला. पाकिस्ताने क्यूसी खावर कुरैशी यांनी जाधव यांच्या प्रकरणात व्हिएन्ना करार लागू होत नसल्याचा दावा केला. जाधव यांना अटक करण्यात आल्यानंतर भारताकडे पुरावे सादर करण्यात आले मात्र. त्याकडे दुर्लक्ष करण्यात आल्याचा दावा पाकिस्तानने केला.

आता दोन्ही देशांनी आपली भूमिका मांडल्य़ानंतर खटल्याच्या पुढील सुनावणीकडे सगळ्यांचे लक्ष लागले आहे.