जबरदस्ती विवाह, आधुनिक गुलामगिरीत भारताचा क्रमांक वरचा; जगातील ५ कोटी लोक बळी

वृत्तसंस्था, संयुक्त राष्ट्रे : जगभरातील सर्वांत धनाढ्य २० देश वेठबिगारीला चालना देत असून ‘आधुनिक गुलामगिरी’त जगणाऱ्या सुमारे पाच कोटी लोकांपैकी अर्ध्याहून अधिक जण या देशांत आहेत, याकडे बुधवारी प्रसिद्ध झालेल्या एका अहवालातून लक्ष वेधण्यात आले. अधिकारांसाठी लढणाऱ्या ‘वॉक फ्री फाऊंडेशन’ने हा अहवाल तयार केला आहे. यामध्ये आधुनिक गुलामगिरीवर प्रकाश टाकण्यात आला.

गेल्या सप्टेंबरमध्ये संयुक्त राष्ट्रांच्या ‘इंटरनॅशनल लेबर ऑर्गनायझेशन’ आणि ‘इंटरनॅशनल ऑर्गनायझेशन फॉर मायग्रेशन अॅण्ड वॉक फ्री’ यांनी तयार केलेल्या अहवालात २०२१च्या अखेरपर्यंत पाच कोटी नागरिक आधुनिक गुलामगिरीत राहत असल्याचा अंदाज व्यक्त करण्यात आला होता. यातील २.८ कोटी जणांना वेठबिगारीस आणि २.२ कोटी जणांना सक्तीच्या विवाहास सामोरे जावे लागल्याचे नमूद करण्यात आले. २०१६पासून पाच वर्षांतच हे प्रमाण एक कोटीने वाढले. ‘आधुनिक गुलामगिरी आपल्या समाजाच्या प्रत्येक पैलूवर पसरली आहे,’ असे ‘वॉक फ्री’चे संस्थापक संचालक ग्रेस फॉरेस्ट यांनी एका निवेदनात म्हटले आहे.

सहा देशांत सर्वाधिक संख्या

वीस राष्ट्रांच्या गटातील सहा सदस्य देशांमध्ये वेठबिगारी किंवा सक्तीचा विवाह अशा आधुनिक गुलामगिरीत जगणाऱ्या नागरिकांची संख्या सर्वाधिक आहे. या यादीत भारताचा क्रमांक वरचा आहे. येथे १.१ कोटी, चीनमध्ये ५८ लाख, रशियामध्ये १९ लाख, इंडोनेशियात १८ लाख, तुर्कीत १३ लाख आणि अमेरिकेत ११ लाख नागरिक या वर्गवारीत येतात.

सर्वांत कमी प्रभाव असलेली राष्ट्रे

आधुनिक गुलामगिरीचा प्रभाव सर्वांत कमी असणारे स्वित्झर्लंड, नॉर्वे, जर्मनी, नेदलँड, स्वीडन, डेन्मार्क, बेल्जियम, आयर्लंड, जपान, फिनलँड असे बहुतांश देशही जी-२०चे सदस्य आहेत, असे या अहवालात नमूद करण्यात आले.
ड्रग्स माफिया कैलास राजपूतचा राईट हॅण्ड शिराझीला अटक; मुंबई विमानतळावरुन घेतले ताब्यात
अहवालातील धोका

जी-२० राष्ट्रे वार्षिक ४६.८ कोटी डॉलर किंमतीची उत्पादने आयात करतात. इलेक्ट्रॉनिक्स, कपडे, पामतेल, सौर पॅनेल आदी उत्पादने वेठबिगारीद्वारे उत्पादित होण्याचा धोका आहे, असेही अहवालात अधोरेखित करण्यात आले आहे.