‘उचल्या’ला रोखून केले अन्नदान

वॉशिंग्टन:

अमेरिकेतील एका दुकानामधून उचलेगिरी करणाऱ्या एका किशोरवयीन मुलाला रोखताना, तो पोटातल्या भुकेपोटी अन्नपदार्थांची चोरी करत असल्याचे समोर आल्यानंतर दुकानाच्या भारतीय-अमेरिकन मालकाने पोलिस तक्रार मागे घेत त्या मुलाला पिशवीभर अन्नपदार्थ दान केले. ही घटना सोशल मीडियावर व्हायरल झाली असून हजारो व्यक्तींनी पोस्ट शेअर करत दुकानमालकाच्या सहृदयतेला सलाम केला आहे.

अमेरिकेतील ओहायो प्रांतात टोलेडो येथे जय सिंह या भारतीय-अमेरिकनाचे '७-इलेव्हन' दुकान आहे. एक किशोरवयीन मुलगा काही वस्तू उचलून हळूच आपल्या खिशात घालत असल्याचे दुकानातील सुरक्षा कॅमेरामध्ये आढळल्याने, '९११' या हेल्पलाइन क्रमांकावर तक्रार करण्यात आली. परंतु, या मुलाने चोरलेल्या वस्तू पुन्हा काढून ठेवल्या असता, त्यात सर्व अन्नपदार्थ आढळल्याने जय सिंह यांचे मन हेलावले. आपल्याला भूक लागली असून भावासाठी खाद्यपदार्थांची चोरी करत असल्याचे त्या मुलाने सांगताच, त्यांच्या मनाला वेदना झाल्या. त्यांनी पोलिसांत दिलेली तक्रार मागे घेत, त्या मुलाला पिशवी भरून अन्नपदार्थ दिले.

जय सिंह यांच्या या कृतीने घटनास्थळी उपस्थित असलेल्या सेड्रिक बिशप या नियमित ग्राहकाचेही मन भरून आले. त्यांनी याबाबत सोशल मीडियावर पोस्ट केल्यानंतर, अनेकांनी ही पोस्ट शेअर करत सिंह यांना सलाम केला.

ही भारतीय संस्कृती

'या लहान मुलावर आताच 'चोर' असा शिक्का बसला, तर पुढे त्याला नोकरी मिळणेही कठीण होईल. त्याच्या भुकेचा प्रश्न सोडवण्याचा उपाय नाही,' असे सांगतानाच भुकेल्या व्यक्तीला अन्नदान करण हे पुण्याचे काम आहे, ही भारतीय संस्कृती असल्याचे जय सिंह यांनी सांगितले.