Joe Biden राष्ट्राध्यक्ष बायडन म्हणतात, अमेरिकेत भारतीयांचा दबदबा वाढतोय!

वॉशिंग्टन: ‘भारतीय वंशाच्या लोकांचा अमेरिकेतील दबदबा वाढत असून, या देशाचा कारभार हाकण्यात ते महत्त्वाची भूमिका पार पाडत आहेत,’ या शब्दांत अमेरिकेचे अध्यक्ष जो बायडन यांनी अमेरिकेतील भारतीयांविषयी गौरवोद्गार काढले आहेत. बायडन यांनी आपल्या प्रशासनात आतापर्यंत ५५ भारतीयांवर विविध विभागांतील महत्त्वाच्या जबाबदाऱ्या सोपवल्या आहेत. त्या संदर्भात त्यांनी ही प्रशंसा केली. ‘नासा’ने प्रक्षेपित केलेले पर्सिव्हिअरन्स रोव्हर १८ फेब्रुवारीला मंगळावर यशस्वीपणे उतरले. या मोहिमेचे नेतृत्त्व ‘नासा’च्या डॉ. स्वाती मोहन यांनी केले होते. या मोहिमेत सहभागी झालेल्या संशोधकांशी बायडन यांनी गुरुवारी वेबसंवाद साधला. त्या वेळी ते बोलत होते.

बायडन यांनी आपल्या पहिल्या ५० दिवसांच्या अध्यक्षीय कार्यकाळात आत्तापर्यंत ५५ भारतीय अधिकाऱ्यांना विशेष पदे सोपवली आहेत. ‘नासा’च्या या मोहिमेचे नेतृत्त्व करणाऱ्या डॉ. स्वाती यादेखील भारतीय असल्याचा धागा पकडून बायडन यांनी भारतीयांची प्रगती अधोरेखित केली. ‘या देशात स्थायिक झालेल्या भारतीयांचा दबदबा वाढतच आहे. तुम्ही, अमेरिकेच्या उपाध्यक्ष कमला हॅरिस, माझे अध्यक्षीय भाषण लिहिणारे विनय रेड्डी आदी असंख्य भारतीयांनी या देशाच्या कारभाराची सूत्रे हाती घेतली आहेत,’ असे ते डॉ. स्वाती यांना उद्देशून म्हणाले.

वाचा: नासाच्या 'मिशन मंगळ'मध्ये 'या' भारतीय महिला शास्त्रज्ञाचाही वाटा

कमला हॅरिस या निर्वाचित लोकप्रतिनिधीव्यतिरिक्त ५५ भारतीयांवर बायडन यांनी महत्त्वाची जबाबदारी सोपवली आहे. विशेष म्हणजे यात बहुसंख्य महिलांचा समावेश असून त्यातील अनेक जणी या व्हाइट हाउसमध्ये कार्यरत आहेत. यापूर्वी बराक ओबामा यांच्या अध्यक्षीय कार्यकाळात सर्वाधिक भारतीयांची प्रशासनात वर्णी लागली होती.

वाचा: मोदी सरकारच्या 'या' धोरणामुळे अमेरिकेसमोर आव्हान!

वाचा: चीनला घेरण्याची तयारी; क्वॉड देशांच्या प्रमुखांची होणार बैठक

‘आनंददायी, अभिमानास्पद’

‘अमेरिकेच्या प्रशासनात भारतीयांचे वाढते प्रमाण अतिशय आनंददायी आहे. येथील भारतीय समाज अधिकाधिक बळकट होत असून आम्हां सर्वांना याचा अभिमान वाटतो,’ अशी प्रतिक्रिया इंडियास्पोराचे संस्थापक व व्यावसायिक एम. रंगास्वामी यांनी व्यक्त केली.