अमेरिका: बीडच्या दाम्पत्याचा संशयास्पद मृत्यू; चिमुकलीच्या रडण्यामुळे घटना उघडकीस

वॉशिंग्टन/ मुंबई: अमेरिकेत एक भारतीय अभियंता आणि त्याची पत्नी घरातच मृतावस्थेत आढळले आहेत. त्यांची चार वर्षाची चिमुकली बाल्कनीमध्ये एकटीच रडत असल्याचे शेजाऱ्यांनी पाहिले. त्यानंतर या दाम्पत्याचा मृत्यू झाला असल्याचे समोर आले. बालाजी भारत रुद्रवार (वय ३२) आणि त्याची पत्नी आरती बालाजी रुद्रवार (३०) अशी त्यांची नावे आहेत. अमेरिकेतील न्यूजर्सी येथे वास्तव्यास होते. मृतावस्थेत आढळलेली आरती ही गरोदर होती. मूळचे हे महाराष्ट्रातील बीड जिल्ह्यातील आंबेजोगाई तालुक्यातील आहेत.

रुद्रवार यांच्या शेजाऱ्यांनी त्यांच्या मुलीला रडताना पाहिले होते. त्यांनी स्थानिक पोलिसांना याची माहिती दिली. त्यानंतर पोलिसांनी रुद्रवार यांच्या घरात प्रवेश केला. त्यावेळी या दाम्पत्याचा मृतदेह आढळला. बालाजी रुद्रावर यांचे वडील भारत रुद्रवार यांनी सांगितले की, स्थानिक पोलिसांनी गुरुवारी या घटनेची माहिती दिली. या मृत्यूचे कारण अद्याप स्पष्ट झाले नाही. शवविच्छेदनाचा अहवाल अमेरिकन पोलीस पाठवणार असल्याचे त्यांनी सांगितले. दरम्यान, स्थानिक माध्यमांनी या भारतीय दाम्पत्याचा मृत्यू चाकू हल्लात झाला असल्याचे म्हटले आहे.

वाचा: करोना लस: सिरम इन्स्टिट्यूटला धक्का; WHO ने फेटाळली 'ही' मागणी

रुद्रवार यांनी सांगितले की, माझी सून सात महिन्यांची गरोदर होती. आम्ही त्यांच्या घरी गेलो होतो आणि पुन्हा अमेरिकेला जाण्याचे नियोजन करत होतो. माझा मुलगा आणि सून हे दोघेही आनंदी होते. त्यांचे शेजारीही चांगले होते. आवश्यक कार्यवाही पूर्ण केल्यानंतर दोघांचे मृतदेह भारतात पाठवण्यात येणार आहे. त्यासाठी आठ ते १० दिवसांचा कालावधी लागणार असल्याचे त्यांनी सांगितले.

वाचा: ब्राझीलमध्ये करोनाचा हाहाकार; फुकूशिमा अणुभट्टी दुर्घटनेसोबत होतेय तुलना

मृतावस्थेत आढळलेल्या दाम्पत्याची चार वर्षाची मुलगी ही त्यांच्या एका मित्राकडे आहे. स्थानिक भारतीय समुदायांमध्ये या दोघांचा चांगला संपर्क होता. न्यूजर्सीमध्ये भारतीयांची संख्या मोठ्या प्रमाणावर आहे. महाराष्ट्रातील बीड जिल्ह्यातील आंबेजोगाई तालुक्यातील असणारे बालाजी रुद्रवार हे आयटी क्षेत्रात कार्यरत होते. ऑगस्ट २०१५ मध्ये आपल्या पत्नीमध्ये अमेरिकेत गेले होते. वर्ष २०१४ मध्ये त्यांचा विवाह झाला होता. त्यांचे वडील एक व्यावसायिक आहेत.