इस्रायलकडून गाझावर एअर स्ट्राइक; बलून बॉम्ब हल्ल्याला प्रत्युत्तर

तेल अविव: इस्रायली सैन्याने गाझा पट्टीमधील हमासच्या ठिकाणांवर जोरदार हवाई हल्ले केले. इस्रायलच्या सैन्याने दिलेल्या माहितीनुसार पॅलेस्टिनी भागातून ज्वलनशील पदार्थ असलेले बलून बॉम्ब सोडण्यात आले होते. त्याच्या प्रत्युत्तरात इस्रायलने रात्रीच्या सुमारास ही कारवाई केली.

इस्रायलने केलेल्या हवाई हल्ल्यात कोणतीही जीवितहानी झाली नसल्याची माहिती आहे. गाझा पट्टीत हमासच्या ठिकाणांना आणि शस्त्राच्या कारखान्यांना लक्ष्य करण्यात आले असल्याचे इस्रायली सैन्याने म्हटले. तर, इस्रायलच्या हवाई हल्ल्यावर हमासनेदेखील कोणतीही प्रतिक्रिया व्यक्त केली नाही.

वाचा: हमासच्या कंडोम बॉम्बने वाढवली इस्रायलची चिंता; जाणून घ्या काय आहे हा बॉम्ब

Video: कार उडाली आकाशी!; 'फ्लाईंग कार'ची यशस्वी चाचणी

मे महिन्यात पॅलेस्टाइनमधील सशस्त्र गट हमास आणि इस्रायली सैन्यात तीव्र संघर्ष झाला होता. दोन्ही बाजूने रॉकेट हल्ले-हवाई हल्ले सुरू होते. अखेर ११ दिवस संघर्ष केल्यानंतर २१ मे रोजी दोन्ही बाजूने शस्त्रसंधी लागू करण्यात आली. काही दिवसांपूर्वीही इस्रायलमधील उजव्या संघटनांनी जेरुसलेममध्ये मोर्चा काढल्यानंतर हमासने बलून बॉम्ब हल्ले केले होते. त्यामुळे इस्रायलमध्ये काही ठिकाणी किरकोळ आगी लागल्या होत्या. काही ठिकाणी शेतींनाही आग लागली होती.

वाचा: पाकिस्तानच्या ताफ्यात चिनी VT-4 टँकचा समावेश; भारताच्या 'भीष्म'ला आव्हान?

वाचा: चीनसोबत युद्धाची तयारी?; अमेरिका-जपानचा गुप्त युद्ध सराव

मागील आठवड्यात इस्रायलने गाझापट्टीवर काही निर्बंध शिथिल केल्यानंतर बलून बॉम्ब हल्ल्यात घट झाली होती. मात्र, एक जुलै रोजी पुन्हा एकदा बलून बॉम्ब हल्ला करण्यात आला. त्यामुळे सीमालगतच्या भागात आग लागली.

दरम्यान, इजिप्त आणि संयुक्त राष्ट्र संघाने इस्रायलकडून होणारे हल्ले आणि गाझा पट्टीतून होणारे बलून हल्ल्याबाबत मध्यस्थी करण्याचे प्रयत्न सुरू केले आहेत.