इस्रायलच्या पंतप्रधानांचा इशारा, आमची मोहीम अजूनही संपली नाही!

जेरुसलेम: इस्रायल आणि पॅलेस्टाइन दरम्यानचा संघर्ष तीव्र होत आहे. इस्रायलकडून गाझा शहरांवर सातत्याने हल्ले होत आहेत. हे हल्ले आता आणखी तीव्र होणार असल्याचे सूचक वक्तव्य इस्रायलचे पंतप्रधान बेंजामिन नेतन्याहू यांनी केले आहे. इस्रायल आणि पॅलेस्टाइनमध्ये सुरू असणाऱ्या हिंसक संघर्षासाठी नेतन्याहू यांनी हमासला जबाबदार ठरले आहे. हमासने इस्रायलवर रॉकेट डागून संघर्षास सुरुवात केली आहे. गाझामध्ये आणखी हल्ले सुरू राहणार असल्याचे नेतन्याहू यांनी म्हटले आहे.

रॉयटर्सने दिलेल्या वृत्तानुसार, नेतन्याहू यांनी एका भाषणात म्हटले की, या संघर्षासाठी आम्ही नव्हे तर इस्रायलवर हल्ला करणारे जबाबदार आहेत. अजूनही हे ऑपरेशन संपले नाही आणि जोपर्यंत याची आवश्यकता भासत राहणार तोपर्यंत ऑपरेशन सुरूच राहणार असल्याचे त्यांनी म्हटले.

वाचा: पॅलेस्टाइनचे राष्ट्रपती म्हणाले, आम्हालाही शांतता हवीय, पण...

वाचा: पॅलेस्टाइनवर इस्रायलचा भीषण हल्ला; गाझात हमास प्रमुखाचे घर उद्धवस्त!

नेतन्याहू यांनी आपल्या भाषणात म्हटले की, हमासशिवाय इतर नागरिकांना वाचवण्यासाठी आम्ही शक्य तेवढे प्रयत्न करत आहोत. हमास जाणूनबुजून सामान्य नागरिकांच्या मागे लपून त्यांना नुकसान पोहचवण्यासाठी प्रयत्न करत असून आम्ही दहशतवाद्यांवर निशाणा साधत असल्याचे नेतन्याहू यांनी स्पष्ट केले.

वाचा: इस्रायलकडून गाझामध्ये आंतरराष्ट्रीय माध्यमांच्या इमारतींवर हल्ला

इस्रायल आणि हमासमधील संघर्ष सातव्या दिवशीही सुरू आहे. इस्रायलने रविवारी गाझा शहरात हमास प्रमुखांच्या घरावर हल्ला करत घर उद्धवस्त केले. तर, हमासकडून तेल अवीववर रॉकेट डागण्यात आले. आतापर्यंत १०० हून अधिक पॅलेस्टिनी नागरीक ठार झाले असून यामध्ये लहान मुलांचाही समावेश आहे.