हमासने सोडले कंडोम बॉम्ब; इस्रायलकडून गाझामध्ये हवाई हल्ले

गाझा: इस्रायलच्या लढाऊ विमानांनी गाझा पट्टीमधील हमासच्या ठिकाणांवर हल्ला केला. हमासने सोमवारी इस्रायलमध्ये कंडोम बॉम्ब सोडले होते. त्याच्या प्रत्युत्तरात गाझा पट्टीवर हवाई हल्ला करण्यात आला असल्याची माहिती इस्रायली सैन्य अधिकाऱ्यांनी दिली. पॅलेस्टाइनच्या सुरक्षा अधिकाऱ्यांच्या माहितीनुसार, इस्रायलने हमासशी संबंधित काही चौकींवर, ठिकाणांवर हल्ले केले. ही ठिकाणे अल-कसम ब्रिगेड, दक्षिण, मध्य आणि उत्तर गाझा पट्टीतील हमास सशस्त्र शाखेशी संबंधित आहे.

इस्रायलच्या हल्ल्यात कोणतीही जीवितहानी झाल्याचे वृत्त नाही. इस्रायलकडून हवाई हल्ले होण्याच्या शक्यतेने आधीच गाझा पट्टीतील ठिकाणे हमासने रिकामे केले होते. हमासद्वारे चालवण्यात येणाऱ्या अल-अक्सा रेडिओने दिलेल्या माहितीनुसार, हमासने इस्रायलच्या विमानांवर मशीनगनने गोळीबार केला.

अफगाणिस्तान सीमेवरील भारताचा 'गुप्त' लष्करी तळ ठरला वरदान !
इस्रायली माध्यमांनी दिलेल्या वृत्तानुसार, गाझी पट्ट्यातून सोडण्यात आलेल्या कंडोम बॉम्बमुळे दक्षिण इस्रायलमधील ९ हून अधिक ठिकाणी आग लागल्याची घटना समोर आली. काही ठिकाणी शेतीचे मोठे नुकसान झाले.

पाकिस्तानमध्ये पुन्हा चिनी नागरिक लक्ष्य; आत्मघाती हल्ल्यात दोन मुले ठार
कंडोम बॉम्ब म्हणजे काय?

हमासच्या सदस्यांकडून निरोधचा वापर शस्त्रासारखा केला जातो. निरोधमध्ये हवा भरून त्यामध्ये कोळसा व इतर ज्वलनशील पदार्थ, स्फोटके भरतात आणि त्यांना इस्रायलच्या हद्दीत सोडतात. ज्या भागात हे फुगे फुटतात, त्या ठिकाणी स्फोट होतात आणि आग लागते. दक्षिण इस्रायलमध्ये असे फुगे फुटल्याने आगी लागण्याच्या घटनांमध्ये वाढ झाली आहे. 'टाइम्स ऑफ इस्रायल'च्या वृत्तानुसार, या बॉम्बमुळे इस्रायलमधील हजारो एकरवरील शेतीचे नुकसान झाले आहे. यामुळे नागरिकांचे मोठे नुकसान झाले आहे. इस्त्रायली सैन्याच्या म्हणण्यानुसार या निरोध फुग्याचा हेतू लोकांना मारणे आणि विनाश करणे आहे. लहान मुले बर्‍याचदा या फुग्याच्या तावडीत अडकतात. लहान मुलांकडून या फुग्याला स्पर्श केला जातो आणि स्फोट होतो. या फुग्यांच्या स्फोटात लहान मुलेही जखमी झाले आहेत.