जपानमध्ये आबे सरकार निवडणुकांसाठी बरखास्त

मटा ऑनलाइन वृत्त । टोकियो

जपानचे पंतप्रधान शिंजो आबे यांनी निवडणुकांच्या पार्श्वभूमीवर लोकसभा बरखास्त केली आहे. सोमवारी जपानच्या लोकसभा निवडणुकांची घोषणा झाली आहे. २२ ऑक्टोबरला निवडणुका होणार आहेत.

उत्तर कोरियाने केलेल्या अण्वस्त्र चाचण्यांच्या पार्श्वभूमीवर आबे यांना मतदारांचा नव्याने कौल हवा आहे. उजव्या विचारसरणीच्या आबे यांच्या लिबरल डेमोक्रॅट पक्ष २०१२ मध्ये सत्तेवर आला. आप्तस्वकीयांना महत्त्वाची पदे दिल्याच्या आरोपावरून यावर्षीच्या सुरुवातीला आबे अडचणीत आले होते. पण आता विशेषत: उत्तर कोरियाने जपानच्या दिशेने दोन बॅलास्टिक क्षेपणास्त्रांची चाचणी केल्यानंतर आबे यांनी त्याविरोधात कठोर भूमिका घेतली आणि त्यानंतर त्यांच्या नेतृत्वाला जपानी जनतेचा पाठिंबा वाढला आहे.


विरोधी पक्ष कमकुवत असल्याचा लाभ उठवत आबे यांनी मध्यावधी निवडणुकांची घोषणा केली आहे. जनमत चाचण्यांमध्येही त्यांचा एलडीपी पक्ष आघाडीवर आहे. पण टोकियोचे राज्यपाल युरिको कोइके यांच्या रुपाने आबे यांच्यासमोर एक तगडे आव्हान उभे राहिले आहे.