जपानमधील वादळातील मृतांची संख्या ४८ वर

वृत्तसंस्था, टोकियो: जपानमध्ये आलेल्या चक्रीवादळाने घेतलेल्या बळींची संख्या ४८ वर पोचली असून, १६ जण अद्याप बेपत्ता आहेत. २००हून अधिक नागरिक जखमी झाले आहेत. बेपत्ता नागरिकांच्या शोधासाठी बचाव पथकाचे दहा हजारांहून अधिक कर्मचारी शोध घेत आहेत.

जपानला शनिवारी रात्रीपासून मुसळधार पाऊस आणि हागिबीस वादळामुळे अनेक भागात भूस्खलन झाले असून, आपत्तीजनक परिस्थिती निर्माण झाली आहे.

'अद्यापही कित्येक नागरिक बेपत्ता असून, बचाव पथके त्यांचा शोध घेत आहेत. त्यांचे कार्य रात्रंदिवस वेगात सुरू आहे,' अशी माहिती पंतप्रधान शिन्झो आबे यांनी या घटनेनंतर तातडीने बोलावलेल्या बैठकीत दिली.

बचाव पथकांद्वारे मातीच्या ढिगाऱ्यांखाली बेपत्ता नागरिकांचा शोध घेणे सुरू आहे; तसेच जपानच्या हवामान विभागाने जपानच्या मध्य आणि पूर्व भागात पावसाची शक्यता व्यक्त केली असून, पुन्हा पूरस्थिती निर्माण होण्याचा अंदाज वर्तवला आहे.