करोना साथीच्या पार्श्वभूमीवर बांगलादेशाचा निर्णय
वृत्तसंस्था, ढाका
करोना विषाणूच्या साथीच्या पार्श्वभूमीवर बांगलादेशाच्या माजी पंतप्रधान आणि विरोधी पक्षांच्या प्रमुख नेत्या खालिदा झिया यांना बुधवारी सहा महिन्यांसाठी तुरुंगातून मुक्तता करण्यात आले.
बांगलादेश नॅशनलिस्ट पार्टीच्या प्रमुख बेगम खालिदा झिया यांना भ्रष्टाचाराच्या दोन प्रकरणांमध्ये १७ वर्षांची शिक्षा झाली असून ८ फेब्रुवारी २०१८पासून त्या तुरुंगात आहेत. 'बांगलादेशच्या पंतप्रधान शेख हसीना यांच्या मंजुरीनंतर मानवतावादी भूमिकेतून बुधवारी दुपारी खालिदा झिया यांची सशर्त मुक्तता करण्यात आली,' अशी माहिती देशाचे गृहमंत्री असदुझ्झमन खान कमाल यांनी दिली.
सन १९९१पासून तीन वेळा झिया यांनी बांगलादेशाचे पंतप्रधान पद भूषवले आहे. सन २०१८च्या निवडणुकीत त्यांच्या पक्षाचा दारूण पराभव झाला होता. त्या वेळी त्यांच्या पक्षाला ३०० सदस्यांच्या संसदेत केवळ सहा जागा मिळाल्या होत्या. नैतिक गैरवर्तनाच्या आरोपांवरून न्यायालयाने दोषी ठरवल्याने त्यांना निवडणूक लढविण्यावर बंदी घालण्यात आली आहे.
खालिदा झिया यांनी सन २००१ ते २००६ या काळात पंतप्रधान पदी असताना त्यांचे पती आणि माजी अध्यक्ष झिया उर रहमान यांच्या नावाच्या अनाथालयासाठी परदेशी देणग्यांचा अपहार केल्याप्रकरणी स्थानिक न्यायालयाने फेब्रुवारी २०१८मध्ये त्यांना तुरुंगवासाची शिक्षा सुनावली आहे. त्यानंतर त्याच वर्षात त्यांना भ्रष्टाचाराच्या आणखी एका प्रकरणात दोषी धरून शिक्षा सुनावण्यात आली. ही दोन्ही प्रकरणे राजकीय सूडबुद्धीने करण्यात आल्याचा दावा त्यांच्या पक्षाने केला आहे.