वुहान : करोना विषाणूचे केंद्र ठरलेल्या चीनमधील वुहान या शहराने बुधवारी मोकळा श्वास गेतला. चीन सरकारने या शहराचा लॉकडाउन उठवला असून, साथरोगाच्या उद्रेकामधून ते बाहेर पडले आहे.
वुहानमध्ये गेले ७६ दिवस लॉकडाऊन होता. आता तो उठविण्यात आला असला, तरी काही निर्बंध अद्यापही लागू आहेत. साथ पुन्हा उद्भवू शकते, असा धोकाही कायम असल्याचे तेथील अधिकाऱ्यांनी स्पष्ट केले आहे. या शहराची लोकसंख्या सुमारे एक कोटी १० लाख असून, पहिला करोनाबाधित रुग्ण डिसेंबरमध्ये उजेडात आला होता. त्यानंतर जानेवारीमध्ये हे शहर जगापासून तोडण्यात आले होते. बुधवारी शहरातील रेल्वे सेवा व विमानसेवाही सुरू करण्यात आली. शहराचे राष्ट्रीय महामार्गही सुरू झाले. अलिकडील काही दिवस वुहानमध्ये एकही नवा रुग्ण आढळला नाही. दरम्यान, हुबेई प्रांतातील काही निर्बंधही उठविण्यात आले आहेत. आता बाहेरून येणाऱ्यांमध्ये करोनाचा संसर्ग नसेल, याची खात्री करून घेणे हे या राज्यासमोरील आणि वुहानसमोरील आव्हान आहे. वुहानमधील लॉकडाऊन उठवला असला, तरी धोका टळलेला नाही, असे अधिकाऱ्यांनी पुन्हा सांगितले आहे. काही नागरिक मात्र, बुधवारी मास्कसिवाय रस्त्यावरून फिरत होते.