फळांच्या राजाची ऑस्ट्रेलियावारी

वृत्तसंस्था, मेलबर्न

भारतीयांचा लाडका आंबा प्रथमच ऑस्ट्रेलियावारी करण्याची शक्यता आहे. मात्र त्यासाठी आपल्या फळांच्या राजाला ऑस्ट्रेलियाच्या जैवसुरक्षा मानकांची पूर्तता करावी लागेल. भारत आणि ऑस्ट्रेलियादरम्यान कॅनबेरा फायटोसॅनॅटिक प्रोटोकॉलमधील सुधारणेनंतर या निर्यातीची दालने खऱ्या अर्थाने खुली झाली आहेत.

हे आंबे सीझन संपल्यानंतर विकले जातील, अशी माहिती ऑस्ट्रेलियाच्या आंबा उद्योग असोसिएशनचे मुख्य कार्यकारी अधिकारी के. रॉबर्ट ग्रे यांनी दिली. ‘आमच्या देशात येणाऱ्या आंब्यांवर कीटकनाशकांची फवारणी झालेली नसावी किंवा हे फळ ऑस्ट्रेलियात येताना कोणतेही रोग घेऊन येऊ नये, या अटींची पूर्तता झाल्यानंतरच आम्ही अन्य देशांतील आंबा आमच्या देशात आणू,’ असेही ते म्हणाले. गेल्या काही वर्षांपासून मेक्सिको, फिलिपीन्स आणि पाकिस्तानातील आंबा ऑस्ट्रोलियात जात होता.

भारताने अमेरिकेलाही आंबा निर्यात करण्यास सुरुवात केली आहे. मात्र ऑस्ट्रेलियात येणाऱ्या आंब्याचा आकार, प्रजात आणि दर्जा काय असेल, याचा अद्याप अंदाज नसल्याचेही ग्रे यांनी स्पष्ट केले.

‘भारतात आंब्याचे उत्पादन खूप मोठ्या प्रमाणावर घेतले जाते. त्यांची निर्यातपद्धतीही काही प्रमाणता आमच्यासारखीच आहे. कमी किंमतीमध्ये उच्च दर्जाची उत्पादने विकली जाणाऱ्या लहान बाजारपेठांमध्ये भारतातून आलेले फळ मुख्यतः विकले जाईल,’ असेही त्यांनी सांगितले.