बेकायदा कर वसुलीविरोधात पाकमध्ये उद्रेक

मटा ऑनलाइन वृत्त । स्कर्दू

पाकिस्तानने गिलगिट-बाल्टिस्तानला ५ वं राज्यं घोषित करण्याचा प्रयत्न सुरू केला असला तरी गिलगिट-बाल्टिस्तानमध्ये मात्र अराजकासारखी स्थिती निर्माण झाली आहे. पाकिस्तान सरकारकडून बेकायदेशीरपणे कर वसुली केली जात असल्याने येथील नागरिकांचा उद्रेक झाला असून हजारो नागरिकांनी रस्त्यावर उतरून या करवाढीचा जोरदार विरोध केला आहे. अनेक भागात बंदही पुकारण्यात आल्यानं गिलगिट-बाल्टिस्तानात तणाव निर्माण झाला आहे. सरकारने करवाढ मागे न घेतल्यास राजधानी इस्लामाबादवर कूच करण्याचा इशाराही या आंदोलकांनी दिला आहे.

पाकिस्तान त्यांचे वर्चस्व असलेल्या परिसरातून जास्त कर वसूल करत असल्याचा गिलगिट-बाल्टिस्तानच्या लोकांचा आरोप आहे. हा परिसर अत्यंत मागासलेला आहे. येथील व्यापाऱ्यांची मिळकतही यथातथाच आहे, असं असतानाही पाकिस्तान सरकार कर वसूल करत असून ही वसुली अन्यायकारक असल्याचं आंदोलकांचं म्हणणं आहे.

सरकारच्या या बेकायदेशीर कर वसुली विरोधात हजारो नागरिक सकाळपासून रस्त्यावर उतरले असून जोरदार घोषणाबाजी करत आहेत. गिलगिट-बाल्टिस्तानात व्यापाऱ्यांनी एकजूट दाखवत कडकडीत बंद पुकारला आहे. त्यामुळे या भागातील आर्थिक व्यवहार ठप्प झाले आहेत.

घरातील चिकनसाठीही कर देणार का?

या आंदोलनातील एका नेत्याने तर पाकिस्तान सरकारच्या कर वसुलीच्या कारवाईची लक्तरेच वेशीवर मांडली. आता तुम्ही तुमच्या घरात ठेवण्यात आलेल्या चिकनसाठीही कर देणार काय?, दुधासाठी घरात पाळलेल्या गायीवरही कर देणार काय? असा सवाल या नेत्याने केला आहे. घरात ५ सदस्यांपेक्षा अधिक सदस्य असतील तर तुम्हाला कर भरावा लागेल. त्यामुळे आम्ही कर भरणार नाही. कराची, क्वेटा, लाहोर आणि पाकिस्तानातील इतर भागात राहणाऱ्या गिलगिट-बाल्टिस्तानच्या नागरिकांनी तयार रहावं. आपल्याला राजधानी इस्लामाबादला कूच करायचं आहे, असं आवाहनही या नेत्यानं केलं.

सबसिडी, मूलभूत अधिकार आणि संविधानाचा विचार न करता कर वाढ करण्यात आली आहे. हा कर कधीच गिलगिट-बाल्टिस्तानच्या विकासासाठी वापरण्यात येणार नाही. केवळ अध्यादेश काढून ही कर्जवाढ केली जात आहे. त्यामुळे पाकिस्तान सरकार जोपर्यंत कर वाढ मागे घेत नाही, तोपर्यंत आंदोलन सुरूच ठेवू, असा इशारा पाकिस्तानने दिला आहे.