वृत्तसंस्था, लॉस एंजेलिस
वाऱ्याच्या वेगाने लागलेल्या वणव्यामुळे दक्षिण कॅलिफोर्निया येथून शुक्रवारी सुमारे एक लाख नागरिकांचे स्थलांतर करावे लागले. या आगीमुळे डझनभर वास्तू आणि घरांचे नुकसान झाले असून, साधारण प्रतितास ८०० एकर या वेगाने पसरणारी ही आग विझवायला काही दिवस लागतील, असे अधिकृत सूत्रांकडून सांगण्यात आले.
सॅन फर्नांडो व्हॅली येथे जवळपास सात हजार ५४२ एकर एवढ्या परिसरात ही आग शुक्रवारी सायंकाळी भडकली आणि उत्तरेकडे लॉस एंजेलिसकडे जवळपास ३२ किलोमीटरपर्यंत पसरत गेली. ५० वर्षीय एक व्यक्ती घर वाचविण्याच्या नादात या आगीच्या भक्ष्यस्थानी पडल्याचे अग्निशमन दलाच्या जवानांनी सांगितले.
आगीमुळे संबंधित परिसरातील मेट्रोची वाहतूक ठप्प झाली असून, याचा परिणाम शाळा आणि उद्योग- व्यवसायांवर झाला आहे. अग्निशमन दलाचे २०० कर्मचारी आग विझवण्याचा प्रयत्न करीत आहेत. चंदनाच्या वृक्षांना लागलेल्या आगीने ७६ घरे भस्मसात केली असून, यात ८९ वर्षांच्या वृद्धेचा होरपळून मृत्यू झाला.