वृत्तसंस्था, ओसाका (जपान)
पंतप्रधान नरेंद्र मोदी आणि सौदी अरेबियाचे युवराज महंमद बिन सलमान यांनी शुक्रवारी व्यापार, गुंतवणूक, उर्जा सुरक्षा आणि दहशतवादविरोध या विषयांवर द्विपक्षीय सहकार्य अधिक बळकट करण्याच्या दृष्टीने चर्चा केली. पंतप्रधान मोदी यांनी जी-२० परिषदेदरम्यान सलमान यांची भेट घेतली. सौदी अरेबिया हा भारताला खनिज तेलाचा प्रमुख पुरवठादार आहे. मात्र, उर्जेशिवाय अन्य क्षेत्रांमध्येही धोरणात्मक भागीदारी करण्यावर उभय देशांनी सहमती दर्शवली आहे. परराष्ट्र मंत्रालयाचे प्रवक्ता रवीश कुमार यांनी ट्वीटरद्वारे ही माहिती दिली. युवराज सलमान फेब्रुवारी महिन्यात भारतभेटीवर आले होते. या भेटीत भारताने पाकिस्तान पुरस्कृत दहशतवादाचा मुद्दा उपस्थित करून दहशतवादविरोधी लढ्यात सहकार्य करण्यासाठी चर्चा केली होती.