‘भारताचे परराष्ट्र धोरण विरोधाभासी’

अमेरिकेबरोबरच्या संबंधांसंदर्भात चिनी माध्यमांची टीका

वृत्तसंस्था, बीजिंग

चीनबरोबर चर्चेसाठी पाऊल पुढे टाकण्याबरोबरच अमेरिकेबरोबर दृढ संबंध प्रस्थापित करण्याच्या भारताच्या परराष्ट्र धोरणावर चिनी माध्यमांनी टीका केली आहे. ‘भारताचे विरोधाभासी हे धोरण कठीण परिस्थिती करून ठेवेल,’ असा इशारा माध्यमांमधून देण्यात आला आहे.

चीनचे अधिकृत सरकारी माध्यम असलेल्या ‘ग्लोबल टाइम्स’ या वेबसाइटवरील एका लेखामध्ये म्हटले आहे, ‘राजकीय नेतृत्वाचा अभाव आणि अलिप्ततावादासारख्या विचारसरणीशी स्वयंसंशयी असल्याचा फटका यापूर्वीच्या भारतातील सरकारांना बसला आहे. पंतप्रधान नरेंद्र मोदी यांच्या सरकारमध्ये जलद कृती करण्यासाठीची स्थिती अधिक चांगली आहे; पण त्यामुळे परराष्ट्र धोरणात ते विरोधाभासी अशा कृती करीत आहेत. भारतीय नौदल अमेरिकेबरोबर दक्षिण चीन समुद्रात गस्त घालेल, असे अमेरिकेच्या लष्करी अधिकाऱ्याने फेब्रुवारी महिन्याच्या मध्यात जाहीर केले. त्यानंतर अशा प्रकारच्या संयुक्त गस्तीला भारताने तत्काळ नकार दर्शवला. मोदी सरकारने चीनशी संबंधित मुद्द्यांबाबत आधीच्या सरकारांपेक्षा अधिक ठळक अशा भूमिका घेतल्या आहेत.’

‘भारताचे राजदूत दक्षिण चीन समुद्रामधील फिलिपिन्सच्या दाव्याला केवळ उघडपणे पाठिंबा देतात, असे नाही, तर भारतातील धोरणकर्त्यांमध्ये अमेरिका, जपान आणि ऑस्ट्रेलिया यांच्या सागरी वादामधील चीनविरोधी भूमिकेचे पडसादही उमटतात. अमेरिकेबरोबर रसद पुरवठा करार करण्याची घोषणा भारताने केली. याद्वारे अमेरिकेच्या तळांना या ठिकाणी येण्याची मुभा मिळणार आहे. चीनशी संवादही भारत वाढवत आहे.’

चिनी माध्यमांत म्हटले आहे, ‘मोठ्या सत्तांशी असलेल्या संबंधांमध्ये अशा प्रकारचा चढ-उतार ठेवणे त्यांनाच (भारताला) कदाचित कठीण परिस्थिती करून ठेवील. सहजसाध्य होईल, असे फळ असेल, तर ते यापूर्वीच तोडले गेले आहे. अशा प्रकारची सामरिक नीती फारच थोडी परिणामकारक ठरते.’