मोदी 'महान पंतप्रधान'; ट्रम्प यांचे गौरवोद्गार

मटा ऑनलाइन वृत्त । वॉशिंग्टन

पंतप्रधान नरेंद्र मोदी हे महान पंतप्रधान आहेत, त्यांच्यासारख्या नेत्यानं आपल्या देशात येणं ही आमच्यासाठी सन्मानाची गोष्ट आहे, असे गौरवोद्गार अमेरिकेचे राष्ट्राध्यक्ष डोनाल्ड ट्रम्प यांनी काढले आहेत. त्यांच्या या स्वागताचा नम्रपणे स्वीकार करत, हा माझा नव्हे; तर सव्वाशे कोटी भारतीयांचा सन्मान असल्याची भावना मोदींनी व्यक्त केली.

'पंतप्रधान मोदी खूप चांगलं काम करताहेत. माझं त्यांच्याशी बोलणं होतं असतं आणि मी त्यांच्याबाबत वृत्तपत्रांत वाचतोही. आर्थिक आघाड्यांवर आणि अन्यही अनेक क्षेत्रात भारत उत्तम कामगिरी करतोय. त्यासाठी मी पंतप्रधानांचं अभिनंदन करतो', अशा शब्दांत ट्रम्प यांनी मोदींची पाठ थोपटली.

'खरा मित्र' असा मोदींचा उल्लेख करून ट्रम्प यांनी त्यांच्यासाठी 'रेड कार्पेट' अंथरलं होतं. त्यामुळे 'व्हाइट हाउस'मध्ये ते या दोस्ताचं कसं स्वागत करतात, याबद्दल उत्सुकता होती. जेव्हा मोदी व्हाइट हाउसमध्ये पोहोचले, तेव्हा ट्रम्प यांनी त्यांची गळाभेटच घेतली. औपचारिक संवादांनंतर ट्रम्प आणि त्यांची पत्नी मेलानिया हे मोदींना राजमहालात घेऊन गेले आणि त्यांनी अत्यंत मैत्रिपूर्ण वातावरणात त्यांच्यात चर्चा झाली, गप्पा झाल्या.