शरीफ यांच्या वक्तव्याचा चुकीचा अर्थ काढला

इस्लामाबाद: पाकिस्तानचे माजी पंतप्रधान नवाज शरीफ यांनी मुंबईवरील हल्ल्यात पाकिस्तानचा हात असल्याची कबुली दिली होती. शरीफ यांच्या या कबुलीनंतर पाकिस्तानात खळबळ उडाल्याने पाकिस्तान मुस्लिम लीगने त्यांच्यावतीनं सारवासारव केली आहे. नवाज यांनी तसं वक्तव्य केलंच नसून भारतीय प्रसारमाध्यमांनीच त्यांच्या वक्तव्याचा चुकीचा अर्थ लावला आहे, असं पाकिस्तान मुस्लिम लीगनं म्हटलं आहे.

नवाज शरीफ यांच्या पाकिस्तान मुस्लिम लीग (पीएमएल) पक्षानं तसं प्रसिद्धीपत्रक काढून सारवासारव करण्याचा प्रयत्न केला आहे. मुंबईवरील हल्लाबाबत नवाज शरीफ यांच्या वक्तव्यावर अनेक दावे केले जात असून त्या सर्व दाव्यांना आम्ही नाकारतो. भारतीय प्रसारमाध्यमांनी शरीफ यांच्या वक्तव्याचा चुकीचा अर्थ लावला असून भारतीय मीडियाच्या या दाव्याला पाकिस्तानचा मीडिया सुद्धा भुलला असल्याचा दावा पीएमएलनं केला आहे.

पाकिस्तानची राष्ट्रीय सुरक्षा राखण्यासाठी शरीफ यांनी संपूर्ण समर्पण केलं आहे. त्यासाठी कुणाच्या प्रमाणपत्राची गरज नाही, असं सांगतानाच शरीफ यांनीच १९९८ मध्ये पाकिस्तानला अण्वस्त्रधारी देश बनविण्याचा निर्णय घेतला होता, असंही त्यांनी नमूद केलं.