अमेरिकेत नव्या करोना व्हायरसचा संसर्ग?

लॉस एंजेलिस: अमेरिकेतील कॅलिफोर्निया प्रांतात एका व्यक्तीला नवीन करोनाव्हारसची लागण झाल्याचे समोर आले आहे. मात्र या व्यक्तीने परदेशात प्रवास केल्याची किंवा अन्य कोणा करोनाग्रस्ताच्या संपर्कात आल्याची पार्श्वभूमी नाही. त्यामुळे हा विषाणू अमेरिकेत पसरत असल्याची चिंता निर्माण झाली आहे.

अमेरिकेतील सेंटर फॉर डिसीज कंट्रोलने बुधवारी याबाबत माहिती दिली. सॅनफ्रान्सिस्कोच्या ईशान्येकडील सोलानो कौटींमधील रहिवासी असलेल्या या रुग्णावर उपचार सुरू आहेत.

अमेरिकेत आतापर्यंत एकूण ६० जणांना संसर्ग असल्याचे वृत्त आहे. त्यातील ४२ जणांना जपानमधील डायमंड प्रिन्सेस क्रूझवर करोनाचा संसर्ग झाला होता. भारत दौऱ्यावरून अमेरिकेत परतल्यानंतर डोनाल्ड ट्रम्प यांनी करोनाबाबत उच्चस्तरीय बैठक घेतली. अमेरिकन नागरिकांनी करोनाबाबत चिंता करू नये असे आवाहन ट्रम्प यांनी केले. त्यानंतर कॅलिफोर्निया प्रांतातील व्यक्तीला संसर्ग झाल्याचे समोर आल्यानंतर करोनाबाबत आणखी खबरदारी घेण्यात येत आहे.

चीनमध्ये प्राणहानी २,७४४ वर

बीजिंग : चीनमध्ये उग्र रूप धारण केलेल्या करोना व्हायरसमुळे आणखी २९ जणांचा मृत्यू झाला असून, एकूण मृतांची संख्या २,७४४ वर पोचली आहे. चीनमध्ये करोनाची लागण झालेल्यांची संख्या ७८,४९७ इतकी आहे. २९ पैकी २६ जणांचा मृत्यू हुबेई प्रांत आणि राजधानी वुहानमध्ये झाला आहे. बीजिंग, हेइलोंगजियांग आणि हेनान येथे प्रत्येकी एकाचा मृत्यू झाला आहे. यापूर्वी २९ जानेवारी रोजी एका दिवसात २६ जणांचा मृत्यू झाला होता.


वाचा: करोनाचे जगात थैमान! ४८ देशांमध्ये संसर्ग

पाकिस्तानात दोन रुग्ण

कराची : इराणमधून पाकिस्तानातील कराची येथे परतलेल्या दोघांना करोना व्हायरसची लागण झाली असून, सिंध आणि बलुचिस्तान प्रांतातील सर्व शैक्षणिक संस्था बंद ठेवण्यात आल्या आहेत. 'कराचीमध्ये बुधवारी पाकिस्तानातील पहिला करोना रुग्ण आढळला होता. त्यानंतर, आणखी एकाला लागण झाल्याचे स्पष्ट झाले असून, हे दोघे नुकतेच इराणमधून परतले होते,' असे विशेष आरोग्य सल्लागार डॉ. जफर मिर्झा यांनी सांगितले.