चीनचं हे क्षेपणास्त्र कोणालाही करेल लक्ष्य!

मटा ऑनलाइन वृत्त । पेइचिंग

चीनच्या लष्करात लवकरच एक लांबपल्ल्याचं आंतरमहादि्वपीय बॅलास्टिक मिसाइल समाविष्ट होणार आहे. या क्षेपणस्त्राद्वारे जगातल्या कुठल्याही कोपऱ्यात चीनला निशाणा साधता येणार आहे. हे जनरेशन नेक्स्ट मिसाइल पुढील वर्षी चीनी ताफ्यात सामील होईल.

एका मीडिया रिपोर्टनुसार, हे क्षेपणास्त्र अण्वस्त्रांना एकत्रित वाहून नेण्यास सक्षम असेल. तूंगफूंग-४१ असं या क्षेपणास्त्राचं नाव आहे. शत्रुच्या क्षेपणास्त्राचा धोका ओळखणाऱ्या यंत्रणेला हे क्षेपणास्त्र मात देण्यास सक्षम आहे. याचा वेग मॅक १० हून अधिक तीव्र आहे. २०१२ मध्ये या क्षेपणास्त्राची घोषणा चीनने केली होती. आतापर्यंत ८ वेळा त्याची चाचणी घेण्यात आली आहे. पीपल्स लिबरेशन आर्मीत ते २०१८ ला समाविष्ट केलं जाईल, अशी माहिती चीनचं सरकारी माध्यम ग्लोबल टाइम्सने दिली.

चीनच्या आर्म्स कंट्रोल अँड डिसआर्मामेंट असोसिएशनचे वरीष्ठ सल्लागार शु गुआंगु यांच्या हवाल्याने ग्लोबल टाइम्सने हे वृत्त दिेले आहे. गुआंगु म्हणतात, 'तूंगफूंग-४१ मध्ये तीन स्तरीय इंधन मिसाईल आहे. त्याच्या माऱ्याची क्षमता किमान १२ हजार कि.मी. आहे. याचाच अर्थ चीन जगातल्या कोणत्याही कोपऱ्यात निशाणा साधू शकतं. एका वेळी १० अण्वस्त्र वाहण्याची तूंगफूंग-४१ ची क्षमता आहे आणि त्यावरून या प्रत्येक अण्वस्त्राचा मारा स्वतंत्रपणे करता येतो.'

रशियाच्या तज्ज्ञांनुसार, अमेरिकेला नजरेसमोर ठेवून हे क्षेपणास्त्र तयार केलं आहे. या क्षेपणास्त्राद्वारे चीनमधून अमेरिका आणि युरोपचे सर्व भाग लक्ष्य केले जाऊ शकतात. अमेरिकेचे राष्ट्राध्यक्ष डोनाल्ड ट्रम्प यांच्या चीनवरील वाढत्या दबावाला प्रत्युत्तर म्हणून चीनच्या या रणनीतीकडे पाहिले जात आहे. चीनकडे अशी अनेक मध्यम आणि लांब पल्ल्याची क्षेपणास्त्रे आहेत.