प्राथमिक तपासातून उघड, ब्लॅकबॉक्स सापडले
वृत्तसंस्था, तेहरान
युक्रेनच्या अपघातग्रस्त विमानाने मदतीसाठी संपर्क साधला नसल्याचे इराणच्या तपास अधिकाऱ्यांनी गुरुवारी स्पष्ट केले. विमानतळाकडे परतत असताना विमानाचा स्फोट होऊन बुधवारी १७६ जणांचा मृत्यू झाला होता. मात्र, वैमानिकाने कोणताही संवाद साधला नसल्याचे प्राथमिक तपासात पुढे आले आहे. दरम्यान, दोन्ही ब्लॅकबॉक्स सापडले असून, त्यातील काही भाग उद्ध्वस्त झाल्याने संपूर्ण माहिती मिळविणे अवघड असल्याचेही सूत्रांनी म्हटले आहे.
युक्रेन इंटरनॅशनल एअरलाइन्सचे हे प्रवासी विमान बुधवारी तेहरानजवळच कोसळले. त्यातील बहुसंख्य प्रवासी इराणी आणि युक्रेनी नागरिक होते. बोइंग ७३७ प्रकारच्या या पीएस ७५२ विमानाने येथील इमाम खामेनी विमानतळावरून सकाळी सहा वाजून दहा मिनिटांनी युक्रेनमार्गे कॅनडाकडे जाण्यासाठी उड्डाण केले. मात्र, दोन मिनिटांतच त्याचा रडारशी संपर्क तुटला आणि विमानतळापासून ४५ किलोमीटरवरील शहरयार प्रांतातील खलज अबाद येथे ते कोसळले. दुसऱ्या विमानातील प्रत्यक्षदर्शीने सांगितले की, ज्वालांनी लपेटलेले विमान वेगाने जमिनीवर येत होते. ते कोसळताच मोठा स्फोट झाला. त्यात इंधनाचा प्रचंड साठा असल्याने तसे घडले असावे.
युक्रेनचे तज्ज्ञ तेहरानमध्ये
तपासकामात मदत करण्यासाठी युक्रेनचे तज्ज्ञ तेहरानमध्ये आल्याचे युक्रेनचे अध्यक्ष व्लादिमिर झेलेन्स्की यांनी म्हटले आहे. अपघाताबद्दल आपण इराणचे अध्यक्ष हसन रूहानी यांच्याशी बोलणार असून, सध्या तरी अपघातामागच्या कारणांचा शोध घेण्यास आमचे प्राधान्य असल्याचेही त्यांनी सांगितले. प्राथमिक तपासात, लेझर किंवा अन्य इलेक्ट्रोमॅग्नेटिक उपकरणाच्या मदतीने हा घातपात घडविला नसल्याचे मत तज्ज्ञांनी व्यक्त केले आहे.
मृतांमध्ये कॅनडाचेही अनेक नागरिक असल्याने कॅनडाचे पंतप्रधान जस्टीन ट्रुडो यांनी दु:ख व्यक्त केले आहे. ओट्टावातील संसदेवरील ध्वज अर्ध्यावर उतरविण्यात आला होता. मृतांत कॅनडातील काही नवविवाहितांचा आणि बालकांचाही समावेश असल्याने हळहळ व्यक्त होत आहे.