North Korea missile test उत्तर कोरियाने केली क्षेपणास्त्र चाचणी; अमेरिकेची चर्चेची तयारी

सेऊल/ वॉशिंग्टन: उत्तर कोरियाने कमी अंतरावरील लक्ष्याचा भेद करणाऱ्या क्षेपणास्त्रांची चाचणी केली आहे. अमेरिकन आणि दक्षिण कोरियन अधिकाऱ्यांनी ही माहिती दिली. उत्तर कोरियाने केलेली चाचणी ही चिथावणी देणारी नसून उत्तर कोरियासोबत चर्चा करण्यास तयार असल्याचे अमेरिकेने म्हटले आहे.

अमेरिकेच्या राष्ट्राध्यक्षपदाची सुत्रे जो बायडन यांनी हाती घेतल्यानंतर उत्तर कोरियाने पहिल्यांदाच क्षेपणास्त्र चाचणी केली. अमेरिका जोपर्यंत उत्तर कोरियाला शत्रुत्वाची वागणूक देणे बंद करत नाही, तोपर्यंत कोणतीही चर्चा होणार नसल्याचे उत्तर कोरियाने म्हटले.

उत्तर कोरियाने चाचणी केलेल्या क्षेपणास्त्रांवर संयुक्त राष्ट्र संघ सुरक्षा परिषदेने बंदी घातली नसल्याचे बायडन प्रशासनाच्या दोन अधिकाऱ्यांनी म्हटले.

वाचा: शांतता हवी असेल तर तसं वागा उगाच डिवचू नका; उत्तर कोरियाचा अमेरिकेला इशारा

दक्षिण कोरियाच्या सैन्याने सांगितले की रविवारी उत्तर कोरियाच्या पश्चिम किनाऱ्यावरून दोन क्रूझ क्षेपणास्त्रे डागण्यात आली. बायडन यांनी अमेरिकेचे अध्यक्षपद स्वीकारल्यानंतर उत्तर कोरियाने प्रथमच क्षेपणास्त्राची चाचणी केली. उत्तर कोरियाने केलेल्या चाचणीत फारसं नवीन काही नाही. ती एक सामान्य लष्करी चाचणी असल्याचे अमेरिकेने म्हटले.

वाचा: चीनसोबत दोन हात करण्यास तैवानची तयारी; घातक क्षेपणास्त्राची केली चाचणी

अमेरिका करणार जपान-दक्षिण कोरियाशी चर्चा

उत्तर कोरियाशी संबंधित मुद्द्यांवर पुढील आठवड्यात जपान आणि दक्षिण कोरियाबरोबर राष्ट्रीय सुरक्षा सल्लागार (एनएसए) स्तरावर प्रथमच त्रिपक्षीय चर्चा करण्याची अमेरिकेची योजना आहे.

वाचा: भारताच्या शस्त्र आयातीत ३३ टक्के घट; इस्रायल-फ्रान्सकडून खरेदी वाढली

“उत्तर कोरियाबाबतच्या धोरणाचा आढावा अंतिम टप्प्यात आहे आणि पुढील आठवड्यात जपान-दक्षिण कोरियाचे एनएसए हा आढावा आणि इतर विषयांवर चर्चा करेल,” असे बायडन प्रशासनाच्या वरिष्ठ अधिकाऱ्याने सांगितले. आमचे त्रिपक्षीय सहकार्य आणखी मजबूत करण्यासाठी एका व्यापक चर्चेची आम्ही प्रतीक्षा करत असल्याचे त्यांनी सांगितले.