या भारतीयाचे दुबईतील बुर्ज खलिफात २२ फ्लॅट

मटा ऑनलाइन वृत्त । दुबई

जिद्द आणि इच्छाशक्ती असेल तर, माणूस काहीही करू शकतो. मूळचे भारतीय असलेले जॉर्ज वी. नेरापैराम्बिल यांच्याबाबत असंच म्हणता येईल. मॅकेनिक ते जगातील सर्वांत उंच इमारत 'बुर्ज खलिफा'मधील २२ फ्लॅटचे मालक हा त्यांचा प्रवास थक्क करणारा आहे. 'बुर्ज खलिफा'मधील एकूण ९०० पैकी २२ फ्लॅट जॉर्ज यांचे आहेत.

वयाच्या अकराव्या वर्षापासून वडिलांसोबत शेतमालाचा व्यापार करण्यासाठी जाणाऱ्या जॉर्ज यांना व्यावसायिक बाळकडू त्यांच्याकडूनच मिळाले. त्यांनी शिक्षण पूर्ण केलं. त्यानंतर मॅकेनिक म्हणून दुबई गाठली. दुबईसारख्या देशात 'एसी'चा उद्योग चांगला चालेल हे जॉर्ज यांनी ७०च्या दशकातच हेरले. १९७६ ला त्यांनी शारजा शहरात 'जीईओ' ही 'एसी'ची कंपनी सुरू केली आहे. मॅकेनिक ते एका कंपनीसह बुर्ज खलिफातील २२ फ्लॅटचा मालक हा त्यांचा प्रवास थक्क करणाराच आहे.

'बुर्ज खलिफा'च्या ४९व्या मजल्यावरील फ्लॅटमध्ये त्यांनी प्रसारमाध्यमांना मुलाखत दिली. या इमारतीत आणखीन फ्लॅट घेईन, असं त्यांनी यावेळी सांगितलं. मी फक्त स्वप्न पाहत नाही, तर ती पूर्ण करणाऱ्यांपैकी आहे. त्यामुळे स्वप्नं पाहणं मी कधी सोडत नाही, असं त्यांनी आत्मविश्वासानं सांगितलं. आता गावी येऊन त्रिवेंद्रम-कासरगोडला जोडणारा कालवा बांधायचा आहे, असा मानसही त्यांनी व्यक्त केला.

नवीन शिकणं हेच यशाचं कारण...

रोज नवीन काहीतरी शिकणे आणि ती शिकण्याची इच्छा, हीच माझी सर्वात मोठी संपत्ती आहे. मी रोज काहीतरी नवीन शिकतो. हेच माझ्या यशाचं सर्वात मोठं कारण आहे, असं जॉर्ज यांनी सांगितलं. लोकांनी स्वप्ने पाहायला हवीत. नवीन नवीन गोष्टी शिकून आत्मसात केल्यास कोणतेही ध्येय गाठता येईल, असा विश्वासही त्यांनी व्यक्त केला.

'त्या' मस्करीतून मिळाली प्रेरणा...

बुर्ज खलिफामध्ये तुम्हाला प्रवेशही मिळणार नाही, अशी मस्करी जॉर्ज यांच्या नातेवाईकानं केली होती. पण त्यापासूनच प्रेरणा मिळाली. एका वृत्तपत्रात बुर्ज खलिफातील फ्लॅट भाड्यानं देण्यासंदर्भात जाहिरात वाचली आणि फ्लॅट भाड्यानं घेतला. यानंतर ६ वर्षांनी बुर्ज खलिफात त्यांचे स्वतःचे २२ फ्लॅट आहेत. त्यापैकी पाचमध्ये भाडेकरू आहेत आणि उर्वरित फ्लॅटसाठी भा़डेकरूंचा शोध घेत आहोत, असं जॉर्ज यांनी सांगितलं.