वृत्तसंस्था, वॉशिंग्टन
अमेरिकेचे अध्यक्ष डोनाल्ड ट्रम्प यांच्यावर खुला महाभियोग चालणार आहे. यामुळे डेमोक्रॅट आणि रिपब्लिकन या दोन्ही पक्षांतील सुंदोपसुंदी चव्हाट्यावर येणार आहेत. अमेरिकी जनतेला हे आरोपप्रत्यारोप प्रत्यक्ष पहायला मिळणार आहेत. महाभियोगाची ही खुली सुनावणी बुधावरापासून सुरू होईल.
डोनाल्ड ट्रम्प २०२०मध्ये होणाऱ्या अध्यक्षपदाच्या प्रस्तावित निवडणुकीत निवडून येण्यासाठी युक्रेनची मदत घेतल्याचा व आपल्याला पुन्हा निवडून येता यावे यासाठी सत्तेचा गैरवापर केल्याचा आरोप त्यांच्यावर आहे. अध्यक्षपदावर असताना सत्तेचा गैरवापर आणि कर्तव्यांत कसूर केल्याचा गंभीर आरोप असलेले डोनाल्ड ट्रम्प हे तिसरे राष्ट्राध्यक्ष आहेत.
ट्रम्प यांच्यावर महाभियोग सिनेटमध्ये चालणार आहे. प्रतिनिधीगृहावर डेमोक्रॅट्सचे नियंत्रण आहे, तर सिनेटमध्ये रिपब्लिकन्सचे आधिक्य आहे. बुधवारी महाभियोगासाठी आवश्यक ती चौकशी प्रथमच सार्वजनिक करण्यात आली. सहा आठवड्यांनंतर चौकशीतील तपशील नागरिकांसाठी खुला करण्यात आला. यामध्ये युक्रेनचे अध्यक्ष वोलोदिमीर झेलेन्स्की यांच्यावर दबाव टाकून चौकशी सुरू करण्यास भाग पाडले, जेणेकरून डेमोक्रॅट्स अडचणीत येतील, असा मुख्य आरोप करण्यात आला आहे.