अतिरेक्यांच्या आश्रयदात्या देशांत पाकिस्तान

मटा ऑनलाइन वृत्त । वॉशिंग्टन

दहशतवाद्यांना आश्रय देणारे देश आणि प्रदेशांच्या यादीत अमेरिकेने आज पाकिस्तानच्या नावाचा समावेश केला असून भारतासाठी ही फार मोठी सुखद बातमी मानली जात आहे.

लश्कर-ए-तोयबा आणि जैश-ए-मोहम्मद यासारख्या दहशतवादी संघटना पाकिस्तानात मुक्तपणे वावरत आहेत. दहशतवाद्यांना प्रशिक्षण देण्यापासून ते निधी उभारण्यापर्यंत सगळंकाही राजरोसपणे सुरू आहे. ही बाब लक्षात घेऊनच पाकला दहशतवाद्यांना आश्रय देणाऱ्या देशांच्या यादीत टाकण्यात आलं आहे, असे अमेरिकेकडून सांगण्यात आले आहे.

दरम्यान, पाकिस्तानात कशाप्रकारे दहशतवाद पोसला जातो, याचा पर्दाफाश भारताने सातत्याने आंतरराष्ट्रीय व्यासपीठांवर केला होता. पाकिस्तान हा दहशतवाद्यांना आश्रय देणारा देश म्हणून घोषित करावे, अशी मागणीही भारताने केली होती. त्यापार्श्वभूमीवर अमेरिकेने उचललेलं पाऊल म्हणजे भारताचा फार मोठा विजय असल्याचे मानले जात आहे.