पाकिस्तान बिथरले, युद्धाची हालचाल सुरू

मटा ऑनलाइन वृत्त । इस्लामाबाद

नौशेरामध्ये भारताने पाकिस्तानच्या चौक्या बेचिराख केल्याने पाकिस्तान बिथरला आहे. त्यामुळेच भारताने केलेल्या हल्ल्याला प्रत्युत्तर देण्यासाठी पाकने युद्धाच्या हालचाली सुरू केल्या आहेत. पाकने सियाचीनजवळ एयरफोर्टच्या फॉरवर्ड बेसला सक्रिय केले असून साधारणपणे युद्धाच्या प्रसंगीच हा बेस सक्रिय केला जात असल्याने पाक युद्धाची तयारी करत अंदाज जाणकारांनी वर्तविला आहे.

कालच्या हल्ला जिव्हारी बसल्याने पाकने सियाचीनच्या ग्लॅशियरजवळ हवाई दलाची लढाऊ विमाने उडविली. पाकिस्तानच्या हवाई दलाच्याप्रमुखाने स्वत: ही लढाऊ विमाने उडविली. भारतीय हद्दीतच ही विमाने उडविल्याचा दावा पाकने केला आहे. मात्र भारतीय हवाई दलाने पाकिस्तानचा हा दावा फेटाळून लावला आहे. पाकिस्तानचे कोणतेही विमान भारताच्या हद्दीत उडालेले नाही, असं हवाई दलानं स्पष्ट केलं आहे. पाकिस्तानी मीडियाच्या दाव्यानुसार, पाक हवाई दलाचे प्रमुख सोहेल अमन यांनी सियाचीन जवळ फॉरवर्ड एयरबेसची पाहणी केली आणि हवाई दलाच्या सराव शिबीरात भाग घेतला.

भारताच्या कोणत्याही कारवाईला प्रत्युत्तर देऊ. भारताच्या अनेक पिढ्या लक्षात ठेवतील असं उत्तर भारताला देऊ, असा इशारा अमन यांनी दिला आहे. भारताच्या कोणत्याही इशाऱ्यामुळे पाकिस्तानी नागरिकांनी घाबरून जाऊ नये, असे आवाहनही त्यांनी केले आहे. या अभ्यास शिबीरावेळी अमन यांनी स्वत: मिराज जेट उडविल्याचा दावा पाक मीडियाने केला आहे. स्कुर्दू खोऱ्यात हे विमान उडविण्यात आले असल्याचं सांगण्यात येतं.