Pakistan कर्जासाठी जिन्नांची 'ओळख' गहाण ठेवणार; पाकिस्तानवर नामुष्की

इस्लामाबाद: कर्जाच्या ओझ्याखाली दबलेल्या पाकिस्तानची अवस्था आणखी बिकट होत चालली आहे. नवीन कर्ज काढण्यासाठी पाकिस्तान आपल्या देशातील सर्वात मोठ उद्यान गहाण ठेवण्यावर विचार करत आहे. या उद्यानाला गहाण ठेवून पाकिस्तान ५०० अब्ज रुपयांचे कर्ज घेण्याच्या तयारीत असल्याचे म्हटले जात आहे. विशेष म्हणजे हे उद्यान पाकिस्तानचे संस्थापक मोहम्मद अली जिन्ना यांची बहीण फातिमा जिन्ना यांच्या नावाने आहे.

पाकिस्तानी वृत्तपत्र डॉनने दिलेल्या वृतानुसार, पाकिस्तान सरकारची व्हिडिओ कॉन्फरन्सद्वारे बैठक पार पडणार आहे. फातिमा जिन्ना उद्यान गहाण ठेवून कर्ज घेण्याबाबत मंगळवारी निर्णय होण्याची शक्यता आहे. आर्थिक संकटाचा सामना करावा लागत असल्यामुळे सरकार या फातिमा जिन्ना उद्यानाला गहाण ठेवणार असून ५०० अब्ज रुपये मिळवणार आहेत.

वाचा: सोन्याच्या खाणीचा ताबा महागात पडला; पाकिस्तानला ६ अब्ज डॉलरचा दंड
वाचा: पाकिस्तानचा जगात पचका; मलेशियानं विमान जप्त करून प्रवाशांना उतरवले

इस्लामाबादच्या कॅपिटल डेव्हलपमेंट ऑथरिटीने याआधीच ना हरकत प्रमाणपत्र मिळवले आहे. याआधीदेखील पाकिस्तान सरकारने विविध संस्था आणि इमारतींना गहाण ठेवले आहे. मात्र, यावेळी पाकिस्तानचे संस्थापक असलेले मोहम्मद अली जिना यांच्या बहिणीच्या नावाने असणाऱ्या उद्यानाला गहाण ठेवण्यात येत आहे. हे उद्यान ७५९ एकर जागेवर उभारण्यात आले आहे. पाकिस्तानमध्ये जाणाऱ्या पर्यटकांच्या आकर्षण असलेल्या उद्यानांपैकी एक उद्यान आहे.

वाचा: दुबईचे शाही कुटुंब करणार 'या' दुर्मिळ पक्ष्यांची शिकार; पाकिस्तानची मंजुरी

आर्थिक संकटाचा सामना करणारा पाकिस्तान सातत्याने कर्ज घेत आहे. इम्रान खान यांनी पाकिस्तानची सत्तासूत्रे हाती घेण्यापूर्वी कोणतेही कर्ज घेणार नसल्याची घोषणा केली होती. मात्र, आता पाकिस्तान आर्थिक दिवाळखोरीच्या उंबरठ्यावर आहे. करोनानेदेखील पाकिस्तानच्या अर्थव्यवस्थेचे कंबरडे मोडून काढले. देशाचा आर्थिक गाडा व्यवस्थित चालवण्यासाठी पाकिस्तान सरकारने पुन्हा एकदा १.२ दशलक्ष डॉलरचे कर्ज घेतले आहे.