गिलगिट-बालटीस्तान होणार पाकचा प्रांत?

मटा ऑनलाइन वृत्त । इस्लामाबाद

पाकव्याप्त काश्मिरमध्ये असणाऱ्या गिलगिट-बालटीस्थान भागाला पाकिस्तानने आपला पाचवा प्रांत घोषित करण्यासाठी हालचाली सुरू केल्या आहेत. पाकिस्तानच्या या निर्णयामुळे भारत-पाकिस्तानमधील संबंध चिघळले जाण्याची शक्यता आहे.

पाकिस्तानचे परराष्ट्र व्यवहाराचे सल्लागार सरताझ अजीज यांच्या नेतृत्वाखालील समितीने गिलगिट-बालटीस्थानाला पाकिस्तानचा प्रांत असल्याचे जाहीर करण्याची शिफारस केली असल्याची माहिती पाकिस्तानचे आंतर-प्रांतीय समन्वयक मंत्री रियाझ हुसैन परिजादा यांनी एका वृत्तवाहिनीला दिली आहे. गिलगिट-बालटीस्थानचा दर्जा बदलण्यासाठी पाकिस्तानच्या संविधानात घटना दुरूस्ती करावी लागणार आहे. सुमारे ४६ अब्ज डॉलर खर्च असलेल्या चीन-पाकिस्तान इकॉनॉमिक कॉरिडोरदेखील ह्याच भागातून जाणार आहे. पाकिस्तान व चीन या दोन्ही देशांसाठी हा महत्त्वकांक्षी प्रकल्प आहे. त्यामुळे प्रकल्प पूर्ण करण्यासाठी चीनकडून अधिक जोरदार प्रयत्न सुरू आहेत. या कॉरिडोरच्या या मार्गाला भारताने याआधीही विरोध केला आहे. पाकिस्तानने या भागाला प्रांताचा दर्जा दिल्यास भारत-पाकिस्तान यांच्यातील संबंध अधिक ताणले जाण्याची शक्यता आहे. पाकिस्तानमध्ये बलुचिस्तान, सिंध, खैबर पख्तुनख्वा आणि पंजाब असे चार प्रांत आहेत. गिलगिट बालटीस्थानला पाचव्या प्रांताचा दर्जा देऊन त्यावर आपला हक्क सांगण्याचा पाकचा डाव आहे. त्यामुळे भारत-पाकिस्तानमधील संबंधामध्ये आणखी तणाव निर्माण होण्याची शक्यता आहे.