ब्लॅक डे: पाककडून PoKतील आंदोलकांवर अत्याचार

मटा ऑनलाइन वृत्त । मुझफ्फराबाद

पाकव्याप्त काश्मीर (Pok) आणि गिलगिट-बाल्टिस्तानमध्ये 'काळा दिवस' पाळणाऱ्या निदर्शकांवर पाकिस्तानकडून अगणित अत्याचार करण्यात येत आहेत. हे आंदोलन दडपण्याचा प्रयत्न केला जात आहे. शांततेनं आंदोलन करणाऱ्यांना ताब्यात घेतलं आहे. त्यांच्यावर लाठिमारही करण्यात आला. तर दुसरीकडे निदर्शनासंबंधी प्रसारित होणाऱ्या बातम्या रोखण्यासाठी वृत्तवाहिन्यांवरही बंदी घालण्यात आली आहे.

पाकिस्तानकडून होणाऱ्या अत्याचारांमुळे त्रासलेल्या जम्मू-काश्मीर नॅशनल स्टुडंट्स फेडरेशन (एनएसएफ)च्या सदस्यांनी भारतीय सीमेत दाखल होण्याचा प्रयत्न केला. पाकिस्ताननं आंदोलन चिरडण्यासाठी शेकडो लोकांना अटक केली आहे. शांततेत निदर्शनं करणाऱ्यांवर लाठिमार केला. अश्रूधुराच्या नळकांड्याही फोडल्या. आम्हाला स्वातंत्र्य हवं आहे. पाकिस्ताननं काश्मीरमधून आपले सैन्य हटवावेत. पाकिस्तान स्वतःच्या समस्या सोडवण्यात अपयशी ठरला आहे. समस्येचं मूळ असलेल्या दहशतवादाचा निपटारा केला पाहिजे, अशी प्रतिक्रिया 'एनएसएफ'च्या एका नेत्यानं व्यक्त केली.