पाकिस्तान पुन्हा अस्थितरतेच्या वळणावर

पाकिस्तानचे पंतप्रधान नवाझ शरीफ यांच्याविरोधात इम्रान खान यांनी आंदोलन सुरू केले आहे. इस्लामाबादमध्ये ते बुधवारी (२ नोव्हेंबर) ‘लॉक डाउन’ करणार आहेत. या आंदोलनातून पाकिस्तान पुन्हा अस्थिरतेच्या वळणावर जाईल, अशी शक्यता व्यक्त करण्यात येत आहे.

‘पनामा’मुळे असंतोषाला वाट

२०१३मध्ये नवाझ शरीफ यांचे सरकार आल्यापासूनच इम्रान खान यांनी त्यांच्याविरोधात आघाडी उघडली.

‘पनामा पेपर्स’मध्ये नवाझ शरीफ यांचे नाव असल्याचे समोर आल्यानंतर, इम्रान खान यांनी पुन्हा उचल खाल्ली आहे. राजीनाम्याची मागणी केली.

बेताल आरोपही जोडीला

नवाझ शरीफ भारतीय पंतप्रधान नरेंद्र मोदी यांचे हितसंबंध जपत असल्याचा आरोप.

शरीफ यांच्यावर लंडनमध्ये उपचार सुरू असताना, ते सर्वांत पहिला फोन मोदी यांना करतात, असेही त्यांनी म्हटले आहे.

आंदोलनाच्या व्यूहरचनेत बदल

नवाझ शरीफ यांना आव्हान देताना, इस्लामाबादमध्ये २ नोव्हेंबर रोजी शक्तिप्रदर्शन करत राजधानीचा अन्य देशाशी संपर्क तोडण्याचा इम्रान खान यांचा प्रयत्न आहे.

इस्लामाबादकडे येणाऱ्या प्रमुख मार्गांवर बंदोबस्त केल्यामुळे खान यांचे नियोजन फिस्कटले आहे. कार्यकर्त्यांना छुप्या मार्गांनी इस्लामाबादमध्ये आणण्याचा त्यांचा प्रयत्न आहे.

सरकारकडून धरपकड

इम्रान खान यांच्या आंदोलनाविरोधात सरकारकडून जोरदार धरपकड सुरू केली आहे. यामध्ये ‘पाकिस्तान तेहरिके इन्साफ’च्या कार्यकर्त्यांना ताब्यात घेण्यात येत आहे.

पंजाब प्रांतामध्ये ही कारवाई जास्त प्रमाणात होत आहे. तसेच, इस्लामाबाद आणि रावळपिंडीकडे येणाऱ्या प्रमुख मार्गांवर पोलिस आणि निमलष्करी दलांचा कडेकोट बंदोबस्त तैनात करण्यात आला आहे.

लष्करी बंडाची भीती

पाकिस्तानच्या व्यवस्थेमध्ये लष्कराचा प्रभाव मोठा आहे. या अस्थिरतेचा फायदा घेऊन तेथे पुन्हा लष्करी बंड होणार का, अशी चिंता विश्लेषकांकडून व्यक्त करण्यात येते आहे.

नवाझ शरीफ आणि लष्करातील संबंध तणावाचे आहेत. तर, इम्रान खान आणि लष्करामध्ये लागेबांधे असल्याचे मानण्यात येते.

इम्रान खान यांच्याकडून करण्यात येणारी विधाने लष्कराला सत्ता काबीज करण्यासाठी पार्श्वभूमी तयार करत आहेत का, असा प्रश्न उपस्थित करण्यात येत आहे.

पाकिस्तानात सध्या लोकशाहीचे सरकार नाही, तर नवाझ शरीफ यांची हुकूमशाही आहे. कृष्णकृत्यांवर पडदा टाकण्यासाठी ते सरकारी यंत्रणांचा वापर करत आहेत. लोकशाही काय असते, हे आम्ही त्यांना दाखवून देऊ.

- इम्रान खान, प्रमुख, पाकिस्तान तेहरिके इन्साफ