पाक खासदार साकारणार बुरहान वाणीची भूमिका

उमर फारुख खान, प्रतिनिधी

महाराष्ट्र टाइम्स.कॉम

इस्लामाबाद:

२०१७ मध्ये काश्मीरमध्ये सोशल मीडियाचा वापर करणारा दहशतवादी 'बुरहान वाणी' याच्या आयुष्यावर पाकिस्तानात चित्रपटाची निर्मिती करण्यात येते आहे. या चित्रपटात कराचीचे खासदार आमिर लियाकत हुसैन प्रमुख भूमिकेत दिसणार आहेत.

पंतप्रधान इम्रान खान यांच्या तेहरिक-ए-इन्साफ या पक्षाचेच खासदार असलेले आमीर लियाकत हुसैन एक प्रसिद्ध शो होस्ट आहेत. अनेक रियॅलिटी शोचे आणि धार्मिक कार्यक्रमांचे सूत्रसंचालनही त्यांनी केलं आहे. त्यांच्या धार्मिक वक्तव्यांमुळे ते अनेकदा वादाच्या भोवऱ्यातही अडकले आहेत. ‘बुरहान वाणी काश्मीरचा खरा हिरो आहे. त्याची भूमिका वठवत असलो तरी मी काही खरा हिरो नाही’ अशी भावना आमिर यांनी व्यक्त केली आहे.

प्रसिद्ध दिग्दर्शक आयुब खोसा या चित्रपटाचे दिग्दर्शन करणार आहेत. ‘आतापर्यंत भारतीय चित्रपटांमध्ये ज्याप्रकारे काश्मीर चित्तारले जाते त्याची जगभर चर्चा होते. पण मला खरं काश्मीर कसं आहे हे जगाला दाखवायचं आहे. काश्मिरी चित्रपटांची जगात कुठेच चर्चा होत नाही’ अशी माहिती खोसा यांनी दिली आहे.

२०१६मध्ये बुरहान वाणीने मोठ्या प्रमाणात तरुणांना दहशतवादाकडे ओढण्याचा प्रयत्न केला होता. भारतीय सैन्याने एका एन्काउंटरमध्ये त्याचा खात्मा केला होता.