ओर्ली विमानतळावर गोळीबारात एक ठार

पॅरिस : गेल्या काही महिन्यांत झालेल्या दहशतवादी हल्ल्यांनंतर फ्रान्समध्ये आधीच आणीबाणीची परिस्थिती असताना, राजधानी पॅरिसमधील ओर्ली विमानतळावर एका सैनिकाचे शस्त्र हिसकावून घेणाऱ्या एका व्यक्तीला सुरक्षा दलांनी शनिवारी कंठस्नान घातले. या घटनेत कोणीही जखमी झाले नाही. फ्रान्समध्ये काही आठवड्यातच अध्यक्षपदाची निवडणूक होणार असून ब्रिटनचे राजपुत्र विल्यम्स आणि केट हेही सध्या फ्रान्सच्या दौऱ्यावर आहेत.

पॅरिस शहरातील दुसऱ्या क्रमांकाच्या ओर्ली विमानतळावर स्थानिक वेळेनुसार सकाळी ८.३० वाजता ही घटना घडली. त्यानंतर हे विमानतळ रिकामे करण्यात आले असून दोन्ही टर्मिनल बंद करण्यात आली आहेत.

ओर्ली विमानतळावरील थरारनाट्याच्या दीड तास आधीच पॅरिसच्या स्टेन्स या उपनगरात तपासणीसाठी थांबवलेल्या गाडीतून उतरलेल्या एका व्यक्तीने एका पोलिसावर गोळी झाडली. यात हा पोलिस अधिकारी किरकोळ जखमी झाला.