जगातली सर्वात महाग घड्याळ, किंमत तब्बल...

नवी दिल्ली : जगातील सर्वात महागड्या घड्याळीची किंमत ऐकून तुम्हालाही आश्चर्य वाटेल. या घड्याळीची किंमत तब्बल २२२ कोटी रुपये आहे. स्वित्झर्लंडमधील लक्झरी वॉच निर्माता कंपनी Patek Philippe ने नुकताच एका घड्याळीचा लिलाव केला. ही घडी ३१ मिलियन स्विस फ्रँक म्हणजेच जवळपास २२२ कोटी रुपयांना विकली गेली. जगात आतापर्यंत रिस्टवॉचसाठी (मनगटी घड्याळ) दिली गेलेली ही सर्वाधिक रक्कम आहे. दरम्यान, हा लिलाव चॅरिटीसाठी करण्यात आला होता. नंतर सर्व रक्कम दान करण्यात आली.

Only Watch नावाने चॅरिटीचं आयोजन जिनेव्हामध्ये करण्यात आलं होतं. पाटेक फिलिपची घड्याळ Grandmaster Chime 6300A-010 ला खास चॅरिटी लिलावासाठीच तयार करण्यात आलं होतं. शनिवारी आयोजित केलेला हा लिलाव केवळ पाच मिनिटे चालला. ही घड्याळ २.५ ते ३ मिलियन स्विस फ्रँकमध्ये विकली जाऊ शकते, असाही अंदाज लावला जात होता. यापूर्वी Daytona Rolex नावाच्या घडाळीने सर्वाधिक किंमतीचा मान मिळवला होता. Daytona Rolex घड्याळ २०१७ मध्ये १७.८ मिलियन डॉलर म्हणजे जवळपास १२७ कोटी रुपयांमध्ये खरेदी करण्यात आली होती.

जगातली सर्वात महागडी घड्याळ फक्त वेळ सांगते एवढंच तिचं वैशिष्ट्य नाही. यामध्ये विविध प्रकारचे २० फीचर्स आहेत. यामध्ये एक रिंगटोन, एका मिनिटांचा रिपिटर, चार अंकी डिस्प्ले कॅलेंडर, सेकंड टाइम झोन आणि २४ ताससह मिनिट सबडायल यांसारखे हायटेक फीचर्स आहेत. या घड्याळीचं सर्वात खास फीचर म्हणजे फ्रंट आणि बॅक डायल सांगितलं जातं.