लॉकडाउनचा फटका: भुकेमुळे एक हजार कबुतरांचा तडफडून मृत्यू

काबूल: करोनाच्या संसर्गावर नियंत्रण आणण्यासाठी अनेक देशांनी लॉकडाउनचा पर्याय अवलंबला. मात्र, या लॉकडाउनमुळे जगभरातील कोट्यवधी लोकांना त्रास सहन करावा लागला. लॉकडाउनमुळे माणसांचे हाल होत असताना पक्ष्यांचेही हाल झाले. भुकेमुळे जवळपास एक हजार कबुतरांना प्राण गमवावे लागले असल्याची घटना समोर आली आहे.

अफगाणिस्तानमधील मजार-ए-शरीफच्या निळ्या मशिदीत हे कबुतर पाळण्यात आले होते. करोनाच्या लॉकडाउनमुळे ही प्रसिद्ध मशीद बंद असल्याने कबुतरांना दाने मिळाले नाहीत. त्यामुळे त्यांचा मृत्यू झाला असल्याचे समोर आले आहे. कबुतरांच्या मृत्यूनंतर मशीद प्रशासन आणि सरकारमध्ये आरोप-प्रत्यारोप सुरू आहेत.

वाचा: चीन नव्हे भारतापासून करोना संसर्गाचा धोका; नेपाळचे फुत्कार

इतक्या मोठ्या प्रमाणावर कबुतरांचा मृत्यू झाल्यामुळे प्रशासन खडबडून जागे झाले आहे. तातडीने आरोग्य कर्मचाऱ्यांच्या मदतीने त्यांनी मृत कबुतरांना मशिदीच्या आवारातून हटवले. हे सफेद कबूतर मशिदीच्या परिसरात रहात होते. त्यांच्या खाद्यान्नाची जबाबदारी मशीद प्रशासनाकडेच होती.

वाचा: भारतीय सैन्य अमेरिका, रशियापेक्षा 'लय भारी'!; चिनी तज्ञाकडून कौतुक

करोनाचा संसर्ग सुरू होण्याआधी हजारोंच्या संख्येने लोक मशिदीत येत असे. त्यांच्याकडूनही कबुतरांसाठी खाद्यान्न दिले जायचे. मात्र, लॉकडाउननंतर मशिदीत प्रवेश मनाई करण्यात आली. त्याच दरम्यान मशीद प्रशासनाकडूनही कबुतरांकडे दुर्लक्ष झाले.